Berkarar döwletimiziň bagtyýarlyk döwründe Türkmenistan sagdynlygyň we ruhubelentligiň ýurdy hökmünde tutuş dünýäde giň meşhurlyga eýe boldy. Adam hakyndaky alada şol syýasatyň ileri tutulýan ugry bolupdy we şeýle bolmagynda galýar. Bilşimiz ýaly, Birleşen Milletler Guramasynyň Baş Asiambleýasynyň 72-nji mejlisinde kabul edilen ýörite Kararnama laýyklykda, her ýylyň 3-nji iýuny Bütindünýä welosiped güni diýlip yglan edildi. Munuň özi milli Liderimiziň sebit hem-de ählumumy derejede sportuň ekologiýa taýdan arassa görnüşi hökmünde ykrar edilen welosiped sportuny ösdürmek, sagdyn durmuş ýörelgelerini berkitmek, bu ugurda halkara hyzmatdaşlygyny işjeňleşdirmek boýunça alyp barýan giň möçberli işleriniň halkara derejesinde ykrar edilmesi boldy. Şoňa laýyklykda, häzirki döwürde dürli derejedäki sport ýaryşlarynyň geçirilýän merkezine öwrülen Türkmenistanda 2021-nji ýylda Welotrek boýunça dünýä çempionatyny guramaçylykly geçirmek ugrunda zerur taýýarlyk işleri alnyp barylýar. Ýurdumyzda geçiriljek bu iri ýaryş halklaryň arasyndaky dost-doganlygy, hoşniýetli goňşuçylygy has-da pugtalandyrmaga, bedenterbiýäni we sporty wagyz etmäge, jemgyýetimizde sagdyn durmuş ýörelgelerini işjeň ornaşdyrmaga giň mümkinçilik berer. Şeýle hem ösüp gelýän ýaş nesillerimizi sport bilen meşgullanmaga giňden çekmekdäki, olimpiýa hereketini ösdürmekdäki, ýurdumyzyň halkara sport abraýyny has-da belende götermekdäki nobatdaky ädim bolar.

Ýeri gelende bellesek, ýurdumyzyň ýygyndy toparynyň türgenleriniň iri ýaryşa we sportuň beýleki görnüşlerine ýokary derejede toplumlaýyn esasda taýýarlyk görmegi üçin ähli amatly şertler döredilendir. Şu maksat bilen köpugurly stadionlar, sport mekdepleri, atçylyk sport toplumlary we açyk sport meýdançalary guruldy. Hut şoňa görä-de, döwlet Baştutanymyzyň şahsy göreldesi bilen ýurdumyzda sportuň beýleki görnüşleri bilen bir hatarda, ekologiýa taýdan arassa, özüne çekiji, Olimpiýa oýunlarynyň maksatnamasyna girizilen hem-de dünýäniň köp ýurtlarynda uly meşhurlyga eýe bolan welosiped sportunyň ösdürilmegine möhüm ähmiýet berilýär. Nesip bolsa, bu ýyl has takygy Türkmenistan parahatçylygyň we ynanyşmagyň watany ýylynda, 2021-nji ýylyň 13-17-nji oktýabry aralygynda paýtagtymyzda geçiriljek Welotrek boýunça dünýä çempionatynda hem türgenlerimiz üstünlikli çykyş edip, hormatly Belent Serkerdebaşymyzyň sport ulgamyny, sport diplomatiýasyny ösdürmäge berýän ünsüne mynasyp jogap bererler, ata Watanymyzyň baýdagyny belende götererler!