Mälim bolşy ýaly, Türkmenistanyň 2023 — 2027-nji ýyllar üçin Birleşen Milletler Guramasynyň Bilim, ylym we medeniýet meseleleri boýunça guramasynyň (ÝUNESKO) Bedenterbiýe we sport boýunça hökümetara komitetiniň (CIGEPS) düzümine saýlanylmagy ýurdumyzyň sport diplomatiýasynyň bu ugurdaky ajaýyp üstünligi boldy.

Komitet sportuň ähmiýetli ornuny giňeltmek we ony döwlet syýasatynyň düzümine girizmek maksady bilen, 1978-nji ýylda döredilendir. Türkmenistan bilen ÝUNESKO-nyň hyzmatdaşlygynyň gerimi yzygiderli giňelýär, däp bolan netijeli gatnaşyklary, şol sanda ekologiýa, bedenterbiýe we sport ýaly möhüm ugurlarda hyzmatdaşlygy işjeňleşdirmek üçin täze mümkinçilikler açylýar. BMG we ÝUNESKO guramasy bilen bilelikde türkmen milli göreşini halkara jemgyýetçiliginde meşhurlyga eýe etmekde degişli işler göz öňünde tutulýar. Biziň ýurdumyz ÝUNESKO-nyň sportda doping serişdelerini ulanmaklyga garşy göreş boýunça Halkara Konwensiýasyny tassyklady, Türkmenistanyň dopinge garşy göreş barada milli edarasyny döretdi.

Belläp geçsek, Türkmenistan 2020-nji ýyldan bäri ÝUNESKO-nyň «Fit for life» bedenterbiýe we sagdyn durmuş taslamasyna üstünlikli gatnaşýar.Türkmenistanyň 2023 — 2027-nji ýyllar üçin ÝUNESKO-nyň Bedenterbiýe we sport boýunça hökümetara komitetiniň (CIGEPS) düzümine saýlanylmagy Watanymyzyň halkara giňişlikde hemmetaraplaýyn ýokarlanýan abraýynyň, bedenterbiýäni we sporty ösdürmäge, dünýäde sagdyn durmuş ýörelgelerini wagyz etmäge goşýan saldamly goşandynyň nobatdaky ykrarnamasydyr. Soňky ýyllarda ýurdumyzda iri sport çärelerini geçirmek üçin niýetlenen, dünýä ölçeglerine laýyklykda gurlan olimpiýa sport desgalarynyň binýadynda halkara sport guramalary bilen özara bähbitli hyzmatdaşlykda birnäçe halkara sport ýaryşlary üstünlikli geçirildi. Ýurdumyz Kuraş boýunça XIV dünýä çempionatyny ýokary guramaçylyk derejesinde geçirdi. Dünýä çempionaty türkmen türgenleriniň ajaýyp üstünliklerine beslendi we bu iri halkara ýaryş ýurdumyzyň halkara sport merkezleriniň biri hökmünde eýeleýän ornuny has hem rowaçlandyrdy.

Şasenem DURDYMYRADOWA,
Türkmenistanyň Daşary işler ministrliginiň
Halkara gatnaşyklary institutynyň talyby.