Ruhubelent etrabynyň «Agyzsuw» müdirliginiň hasabyndaky suw arassalaýjy desgalaryň 2-si şäher we oba ilatyny arassa agyz suwy bilen doly üpjün etmäge mümkinçilik berýär. Gije-gündiziň dowamynda 1000 kub metr agyz suwuny arassalaýan zawod etrap merkezinde, kuwwatlylygy 150 kub metre barabar bolan suw arassalaýjy desga Tüniderýa geňeşliginiň çäginde ýerleşýär.

Ruhubelent şäheriniň ýylsaýyn artýan ilatynyň içimlik arassa suwa bolan islegini kanagatlandyrmak maksady bilen, degişli işler alnyp barylýar. Munuň üçin müdirligiň hasabynda hereket edýän dikguýularyň 8-si, bir sany suw ýygnaýjy howdan, şeýle-de uzynlygy 54 kilometre golaý suw geçirijiler peýdalanylýar. Suw desgasynyň eýeçiligindäki ýöriteleşdirilen awtoulaglaryň 4-si arkaly Was düzlüginde aýry-aýrylykda ýerleşýän obalaryň ýaşaýjylaryna takyk kesgitlenen günlerde arassa agyz suwuny eltip bermek ýola goýuldy.