11-14-nji oktýabrda ýokary okuw mekdepleriniň žurnalistika hünärinde okaýan talyplaryň gatnaşmagynda Ýewropada howpsuzlyk we hyzmatdaşlyk guramasynyň (OSCE) Aşgabatdaky merkezi tarapyndan «Žurnalistika bilimini ýokarlandyrmakda we žurnalistleriň hünär taýýarlygynda kömek» atly taslamanyň çäklerinde syýasy kommunikasiýa boýunça okuw maslahaty geçirildi. Okuw maslahatynda guramanyň Aşgabatdaky merkeziniň ýolbaşysy Jon Makgregor, Sankt-Peterburg uniwersitetiniň žurnalistika fakultetiniň dosenti, sosiologiýa ylymlarynyň kandidaty Ilýa Bykow, Dmitriý Gawra çykyş edip, bu ugura degişli okuw sapagyny geçdiler. 4 günläp dowam eden okuw maslahatynda ýokary okuw mekdepleriniň žurnalistika hünärinde okaýan talyplarynyň bilimlerini artdyrmak boýunça maslahatlar berildi we sapaklar geçirildi.

Okuw maslahatyna Magtymguly adyndaky Türkmen döwlet uniwersitetiniň, Halkara ynsanperwer ylymlary we ösüş uniwersitetiniň, Türkmenistanyň Daşary işler ministrliginiň Halkara gatnaşyklary institutynyň žurnalistika hünärinde bilim alýan talyplary gatnaşdylar. Okuw maslahatynyň soňunda oňa gatnaşan talyplara Ýewropada howpsuzlyk we hyzmatdaşlyk guramasynyň (OSCE) Aşgabatdaky merkezi tarapyndan şahadatnamalar gowşuryldy. 

Maksat TAGANOW,

Magtymguly adyndaky TDU-nyň 
žurnalistika hünäriniň talyby.