2024-nji ýylyň 4-nji noýabrynda Seul şäherinde Günorta Koreýanyň Daşary işler ministri Ço The Ýulyň ýolbaşçylygynda 17-nji «Merkezi Aziýa – Koreýa Respublikasy» hyzmatdaşlyk forumy geçirildi. Bu barada Türkmenistanyň Daşary işler ministrliginiň web-saýtynda habar berildi. 

Forumda Merkezi Aziýa ýurtlarynyň daşary syýasat edaralarynyň ýolbaşçylary gatnaşdylar. Ýygnanyşygda ulag-logistika, energiýa, sanlylaşdyrma we daşky gurşaw ýaly ugurlarda Merkezi Aziýa we Koreýa Respublikasynyň arasyndaky hyzmatdaşlygy ösdürmegiň mümkinçilikleri ara alnyp maslahatlaşyldy.

Türkmenistanyň Koreýa Respublikasyndaky Ilçisi B.Durdyýew öz çykyşynda Türkmenistanyň Koreýa bilen giňden hyzmatdaşlyk etmäge bolan islegini bildirdi we ykdysadyýet, ulag, bilim, lukmançylyk, syýahatçylyk, sanly tehnologiýalar, daşky gurşawyň goralmagy, senagat, oba hojalygy we medeni-ynsanperwer gatnaşyklaryň ösdürilmegine aýratyn üns berdi.

Foruma gatnaşyjylar, 2024-nji ýylyň 14-nji oktýabrynda Aşgabatda geçirilen Merkezi Aziýa ýurtlarynyň we Koreýa Respublikasynyň parlament ýolbaşçylarynyň ikinji duşuşygynyň netijelerine hem aýratyn üns berdiler.

Forumyň esasy mejlisiniň ahyrynda, «Üpjünçilik zynjyrlary», «Daşky gurşaw», «Sanlaşdyrma» we «Syýahatçylyk» ugurlary boýunça utgaşykly bölümçeler geçirildi. Türkmenistanyň ministrlikleriniň we pudak edaralarynyň wekilleri sanly aragatnaşyk arkaly bu bölümleriň işine gatnaşdylar.

Forumyň netijeleri boýunça, wekiliýetleriň ýolbaşçylary Bilelikdäki Beýannamany kabul etdiler we 2025-nji ýyl üçin Forumyň sekretariatynyň iş meýilnamasyny tassykladylar. Şonuň bilen bir wagtda, Merkezi Aziýa we Koreýa Respublikasynyň ýurtlarynyň medeni mirasyna bagyşlanan sergi hem synlanyldy.

Mähri SARYÝEWA,
Türkmenistanyň Döwlet energetika institutynyň
talyby.