Magtymguly adyndaky Türkmen döwlet uniwersiteti (TDU) we “Türkmenistan” gazetiniň redaksiýasy, Magtymgulynyň doglan gününiň 300 ýyllygy bilen baglylykda, ýaşlaryň arasynda “Döwrüň özgertmeleri – ýaş žurnalistleriň gözi bilen” atly döredijilik bäsleşigini yglan etdi.
 

Bäsleşigiň maksady, ýaşlary watançylyk, agzybirlik we jemgyýetçilik ruhunda terbiýelemekdir. Bu bäsleşik, ýaş nesle öz Watanyna bolan buýsançlaryny we beýik şahsyýetlere bolan hormatyny beýan etmek üçin giň mümkinçilik berýär. Şeýle hem, bäsleşige hödürlenýän işlerde, Prezident Serdar Berdimuhamedow tarapyndan amala aşyrylan öňdengörüjilikli özgertmeler, Türkmenistan tarapyndan halkara parahatçylygy we durnuklylygy pugtalandyrmak maksady bilen öňe sürülen başlangyçlar we onuň ähmiýeti aýratyn beýan edilmeli.
 

Bäsleşige gatnaşjak gatnaşyjylaryň, öz makalalarynda, şeýle hem, aýratyn şahsyýetleriň zähmet üstünlikleri we gazananlary barada hem gürrüň bermek mümkinçiligi bar.
 

Bäsleşik iki ugur boýunça geçirilýär:
 

• Birinji ugurda “žurnalistika” hünäri boýunça bilim alýan talyplar gatnaşyp bilerler.
   
• Ikinji ugur bolsa, ähli gyzyklanma bildirýän talyplar üçin açykdyr.
   

Bäsleşige hödürlenýän işler, 2024-nji ýylyň 15-nji dekabryna çenli, turkmenuniwersitetitdu@gmail.com we turkmenistan-gazeti@sanly.tm elektron salgylary arkaly kabul edilýär.
 

Bäsleşigiň netijeleri 2024-nji ýylyň dekabr aýynyň ahyrynda belli bolar.
 

Magtymguly adyndaky TDU we “Türkmenistan” gazetiniň geçiren bu bäsleşigi, ýaşlaryň döredijilik mümkinçiliklerini açmak, olaryň Watana bolan buýsanç duýgusyny güýçlendirmek üçin uly ähmiýete eýe bolup, jemgyýetimiziň agzybirligini berkitmekde möhüm orny eýeleýär.
 

Nurtäç ABDYLLAÝEWA,
Türkmenistanyň Döwlet energetika
institutynyň 3-nji ýyl talyby.