10-njy maýda Balkan welaýatynyň Magtymguly etrabynda ýerleşýän «Magtymguly Pyragy» muzeýinde «Magtymguly – geçmişimiz, şu günümiz we geljegimizdir» atly ylmy-amaly maslahat we birnäçe çäreler toplumy geçirildi.

Ir säher bilen dabara gatnaşyjy wekiliýet Magtymguly etrabynda ýerleşýän “Magtymguly Pyragy” muzeýine bardylar.

Bu medeni köpçülikleýin çäreler toplumy Balkan welaýat häkimliginiň, welaýat Medeniýet müdirliginiň, Türkmenistanyň Magtymguly adyndaky Ýaşlar guramasynyň Merkezi Geňeşiniň, Türkmenistanyň Ylymlar akademiýasynyň Magtymguly adyndaky dil, edebiýat we Milli golýazmalar institutynyň bilelikde guramagynda geçirildi.

Ilki bilen “Magtymguly Pyragy” muzeýiniň öňünde bolan aýdym-sazly dabara we «Akyldary sarpalap, galkyndyryp çar ýany, toý baýrama beslenýär Pyragynyň mekany» atly edebi-sazly kompozisiýa dabara badalga berdi. Soňra çärä gatnaşyjylar akyldar şahyryň muzeýiň öňündäki heýkeline gül çemenlerini goýup, söz ussadynyň ruhuna tagzym etdiler.

Dabaranyň çäklerinde  ýurdumyzyň ýaş nesilleriniň arasynda Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň howandarlyk etmeginde surat çekmek bilen meşgullanýan çagalaryň döredijilik ukybyny açyp görkezmek, zehinli ýaşlary ýüze çykarmak hem-de olary höweslendirmek maksady bilen, «Biz – Arkadag Serdarly Watanyň bagtyýar nesilleri» atly surat çekmek boýunça bäsleşik geçirildi.

Şöhrat Akmämmedow,
TMÝG-niň Babadaýhan etrap
Geňeşiniň guramaçylyk bölüminiň 
esasy hünärmeni.