2025-nji ýylyň 17-nji apreli, penşenbe güni, Ukrainanyň paýtagty Kiýewde Magtymgulynyň adyny göterýän kitaphana muzeýiniň döredilmeginiň 50 ýyllygyna hem-de Ýadygärlikleriň we taryhy ýerleriň halkara gününe bagyşlanan medeni-bilim çäre geçirildi. Bu çäre Türkmenistanyň Ukrainadaky ilçihanasy bilen Magtymguly adyndaky kitaphananyň bilelikde guramagynda amala aşyryldy diýip, Türkmenistanyň Daşary işler ministrligi habar berýär.

Dabarada diplomatik wekiller, ylmy jemgyýetçiligiň agzalary, kitaphananyň işgärleri, Kiýew şäherindäki 281-nji mekdebiň okuwçylary we Ukrainada bilim alýan türkmen talyplary gatnaşdylar.

Çäräniň esasy bölegi hökmünde “Türkmenistanyň taryhy-medeni mirasy: Beýik Ýüpek ýolunyň ajaýyp ýerlerine syýahat” atly tanyşdyryş çäre guraldy. Onda myhmanlara Beýik Ýüpek ýolunyň geçýän gadymy medeni merkezleri, türkmen halkynyň baý medeni mirasy, şeýle-de ÝUNESKO-nyň Bütindünýä mirasynyň sanawyna girizilen Gadymy Merw, Köneürgenç we Nusaý ýaly taryhy şäherler barada giňişleýin maglumat berildi. Mundan başga-da Türkmenistanyň beýleki taryhy-medeni goraghanalary barada hem gürrüň edildi.

Kitaphananyň müdirliginiň wagtlaýyn ýolbaşçysy Ýuliýa Lopata çykyşynda Türkmenistanyň hem-de Ukrainanyň halklarynyň arasynda dowam edýän medeni gatnaşyklaryň uly ähmiýetini nygtady. Şeýle hem türkmen tarapyna seýrek duşýan neşirleriň we halkyň baý ruhy mirasyny şöhlelendirýän gymmatly kitaplaryň kitaphana gowşurylandygy üçin minnetdarlyk bildirildi.

1969-njy ýylda esaslandyrylan Magtymguly adyndaky kitaphana, köp ýyllaryň dowamynda beýik şahyryň goşgularynda wasp edilýän milli däpleriň, urp-adatlaryň we ruhy gymmatlyklaryň wagyz edilýän hem-de dabaralandyrylýan merkezi hökmünde çykyş edýär.