Aşgabat şäherinde Garaşsyz Döwletleriň Arkalaşygynyň (GDA) Hökümet Baştutanlarynyň Geňeşiniň nobatdaky mejlisi geçirildi. Bu barada Türkmenistanyň resmi metbugaty habar berdi.

Maslahata Azerbaýjanyň, Belarusyň, Gazagystanyň, Täjigistanyň hem-de Özbegistanyň premýer-ministrleri, şeýle-de Gyrgyzystanyň, Russiýanyň we Ermenistanyň hökümet wekilleri gatnaşdy. Şeýle hem GDA-nyň Baş sekretary Sergeý Lebedew mejlisiň işine gatnaşanlaryň hatarynda boldy.

Duşuşygyň dowamynda taraplar ykdysady hyzmatdaşlygy ösdürmek, sanly ulgamy ornaşdyrmak we ulag-logistika arabaglanyşygyny pugtalandyrmak meselelerini giňişleýin ara alyp maslahatlaşdylar.

Mundan başga-da, hökümet ýolbaşçylary 2030-njy ýyla çenli GDA-nyň kongres-sergi ulgamyny ösdürmek strategiýasyny, dag-magdan hem-de metallurgiýa pudagynyň sanly özgertmeler konsepsiýasyny, şeýle hem 2027–2030-njy ýyllar üçin Döwletara radionawigasiýa maksatnamasyny tassykladylar.

Mejlisde uran gazyp almak bilen bagly önümçilikleriň täsirine sezewar bolan ýerleri dikeltmek boýunça alnyp barylan işleriň netijeleri jemlenildi. Şeýle-de kämillik ýaşyna ýetmedikleriň hemişelik ýaşaýan ýurtlaryna gaýtarylmagy barada kabul edilen ylalaşyga girizilen üýtgetmeler makullandy.

Forumyň jemleri boýunça Minsk şäheri 2027-nji ýylda GDA-nyň Ýaşlar paýtagty, Karaganda şäheri bolsa 2028-nji ýylda GDA-nyň Ýaşlar paýtagty hökmünde yglan edildi.

GDA-nyň Hökümet Baştutanlarynyň Geňeşiniň indiki mejlisiniň 2026-njy ýylyň dekabr aýynda Moskwa şäherinde geçirilmegi meýilleşdirilýär.

Aýlar BATYROWA,

Türkmenistanyň Daşary işler ministrliginiň

Halkara gatnaşyklary institutynyň talyby.