Ýakynda geçirilen 56-nji halkara himiýa olimpiadasynda Türkmenistanyň adyndan çykyş eden mekdep okuwçylary 2 kümüş we 2 bürünç medallary gazanmagy başardylar. Olimpiada 2024-nji ýylyň 21-30-njy iýuly aralygynda Saud Arabystan Patyşalygynyň Er-Riýad şäherinde ýerleşýän King Saud uniwersitetinde geçirildi.

Aşgabat şäherindäki Saparmyrat Türkmenbaşy adyndaky ýöriteleşdirilen umumybilim berýän mekdep internatynyň okuwçylaryndan ybarat topar bu bäsleşikde ýurdumyzyň adyndan çykyş etdiler.  

Netijede, mekdep-internatynyň 11-nji synp okuwçysy Aýgül Atajanowa we 10-njy synp okuwçysy Meýlis Jumaýew kümüş medala, 11-nji synp okuwçysy Jeren Akmyradowa we 10-njy synp okuwçysy Diýar Döwletow bürünç medallara mynasyp bolmagy başardylar.

Mekdep okuwçylaryny himiýa boýunça halkara bäsleşige mekdep-internatynyň himiýa mugallymy Nazar Mämmedow taýýarlady.

Ýaş himiklerden ybarat Milli ýygynda Magtymguly adyndaky Türkmen döwlet uniwersitetiniň mugallymlary Nurjahan Mälikgulyýewa we Yagmyr Tulekow dagylar ýolbaşçylyk etdiler.

Belläp geçsek, Türkmenistanyň himiýa dersi boýunça Milli ýygyndysy bassyr birnäçe ýyl bäri ýokary netije görkezýär. Mekdep okuwçylary geçen ýyl geçirilen 55-nji halkara himiýa olimpiadasynda ýurdumyzyň adyndan 1 kümüş we 3 bürünç medallary gazanmagy başardylar.

Kadyrmyrat ÖWEZGYLYJOW,
Türkmenistanyň Daşary işler ministrliginiň
Halkara gatnaşyklary institutynyň 3-nji ýyl talyby.