Häzirki zaman dünýä ykdysadyýetiniň binýady diňe bir maddy serişdeler bilen däl, eýsem maglumat we kommunikasiýa ukyplary bilen hem berkidilýär. Döwletleriň arasyndaky söwda-ykdysady gatnaşyklaryň barha çylşyrymlaşýan döwründe daşary ýurt dillerini bilmek, aýratyn-da, hytaý dilini özleşdirmek diňe bir bilim görkezijisi däl, eýsem strategik ykdysady artykmaçlyga öwrüldi.

Hytaý Halk Respublikasy häzirki wagtda dünýäniň iň iri eksport edijisi we senagat önümçiliginiň merkezidir. Statistiki maglumatlara görä, dünýä ilatynyň 1,4 milliarddan gowragy hytaý dilinde gepleýär. Bu bolsa hytaý dilini bilýän hünärmen üçin dünýäniň iň uly sarp ediş bazaryna we önümçilik meýdançasyna göni ýol açylýar diýmekdir. Işewürlik gepleşiklerini terjimeçisiz, asyl dilinde alyp barmak — özara ynamyň berkemegine we ykdysady şertnamalaryň has bähbitli baglaşylmagyna şert döredýär.

Häzirki wagtda Hytaý global logistika zynjyrynyň we innowasion tehnologiýalaryň esasy halkasydyr. Söwda, halkara logistika we sanly ykdysadyýet ugurlarynda hytaý dilini bilýän hünärmenlere bolan isleg dünýä derejesinde rekord derejä ýetdi. Köp sanly dünýä ähmiýetli korporasiýalar Hytaý bilen hyzmatdaşlykda işleýän işgärlerinden bu dili bilmegi talap edýärler. Hytaý dilini bilmek ýaş hünärmeniň zähmet bazaryndaky bahasyny we bäsdeşlige ukyplylygyny birnäçe esse ýokarlandyrýan ykdysady faktordur.

Türkmenistan bilen Hytaý Halk Respublikasynyň arasyndaky gatnaşyklar strategik hyzmatdaşlyk derejesine göterildi. Bu gatnaşyklaryň özenini energetika, ulag-logistika we söwda düzýär.

Hytaý dilini öwrenmek, bu diňe bir medeni baýlaşmak däl, eýsem XXI asyryň global ykdysady giňişligine goýulýan iň ygtybarly maýa goýumdyr. Ol ýaş nesil üçin täze işewürlik gatlaklaryny açýar, döwletimiziň halkara söwda gatnaşyklaryndaky ornuny pugtalandyrýar we milli ykdysadyýetimiziň innowasion ösüşine badalga berýär. Şol sebäpli hem hytaý dilini öwrenmek häzirki döwrüň strategik talaby bolup durýar.

Baýram NEPESOW,
Türkmenistanyň senagatçylar we
telekeçiler uniwersitetiniň talyby.