Ahal welaýatynyň Kaka etrabyndaky «Abiwerd» taryhy-medeni döwlet goraghanasynyň çägindäki gadymy Abiwerd galasynda gazuw-barlag işleriniň ýazky möwsümine girişildi. Taryhy galada goraghananyň hünärmenleri tarapyndan ýazky möwsümde ylmy işler alnyp barylýar.

Goraghananyň ýolbaşçysynyň aýtmagyna görä, orta asyr Abiwerd galasyny, onuň diwarlaryny, içki galanyň merkezini, şeýle-de kerwensaraýy içgin öwrenmäge aýratyn ähmiýet berilýär.

Ýeri gelende belläp geçsek, geçen möwsümlerde türkmeniň şöhratly geçmişi hakynda gürrüň berýän bu taryhy künjekde netijeli işler alnyp baryldy hem-de özünde ylmy maglumatlary saklaýan keramiki gap-gaçlaryň, mis teňňeleriň we beýleki gymmatlyklaryň onlarçasy ýüze çykaryldy.