Gazagystan 22-nji fewraldan Türkmenistan bilen serhedindäki Temir-Baba barlag nokadyna elektron nobat ulgamyny girizdi. Bu barada Gazagystanyň Döwlet girdeji komitetiniň metbugat gullugy habar berdi.

Gazak-hytaý serhedindäki birnäçe barlag nokatlarynda 2022-nji ýylyň 23-nji noýabryndan «CarGoRuqsat» elektron nobat hyzmaty girizildi. Elektron nobat hyzmaty «Qoldau.kz» sanly platformasynda ulanyjylar üçin tölegsizdir. «CarGoRuqsat» elektron nobat hyzmaty ýük daşaýjylara nobaty öňünden bellemäge mümkinçilik berýär we bu nobat hemmeler üçin elýeterlidir.

Elektron nobat ulgamynyň maksady ýük awtoulaglary üçin serhet geçelgesini çaltlaşdyrmak bolup, ýük daşaýjylar öňünden nobat bellemek arkaly gözegçilikden geçip bilerler. Bu ulgam salgyt bergileri, ýol tölegleri, ýük awtoulaglarynyň we tirkegleriniň hasaba alynmagy üçin arza berijini barlaýar we serhetdäki nobaty bikanun dolandyrmak howpuny aradan aýyrýar.

Gazagystan bu ulgamy gazak-özbek serhedinde ýerleşýän Mangistau welaýatyndaky Tažen barlag nokadyna hem ýerleşdirdi. Elektron nobat ulgamy Gazagystanyň Maliýe ministrliginiň «Maglumat we buhgalteriýa merkezi» paýdarlar jemgyýeti tarapyndan döredildi. Häzirki wagta çenli bu ulgamda takmynan 7,5 müň ulanyjy hasaba alyndy we olar 84 müň sany öňünden nobat bellemek amallaryny amala aşyrdylar.

Elektron nobat hyzmaty yzygiderli ösdürilýär we kämilleşdirilýär. Ýakyn wagtda bu ulgama «Face ID»-niň üsti bilen, şeýle hem daşary ýurt raýatlary üçin bank karty arkaly şahsyýeti tassyklamak hyzmaty giriziler. 

Öwezmyrat GURBANOW,

Türkmen döwlet binagärlik-gurluşyk
institutynyň talyby.