Golaýda, Mary şäheriniň 1-nji sport mekdebinde 2005-2006-njy hem-de 2007-2008-nji ýyllarda doglan türgenleriň arasynda futzal boýunça Mary welaýatynyň birinjiligi ugrunda ýaryş geçirildi.

2005-2006-njy ýyllarda doglan türgenleriň arasynda geçirilen ýaryşda Mary şäheriniň 2-nji sport mekdebiniň türgenler topary öňe saýlanmagy başardy. Türkmengala etrabynyň sport mekdebiniň topary ikinji, Mary şäheriniň 3-nji sport mekdebiniň türgenleri üçünji orunlary eýelediler. Ýaryşda tapawutlanan türgenlere Türkmenistanyň Magtymguly adyndaky Ýaşlar guramasynyň Mary welaýat geňeşiniň hem-de Mary welaýat bedenterbiýe we sport baradaky baş müdirliginiň ýadygärlik sowgatlary we Hormat hatlary gowşuryldy.

2007-2008-nji ýyllarda doglanlaryň arasynda geçirilen ýaryşda Mary şäheriniň 1-nji sport mekdebiniň 1-nji «Olimp» hem-de 2-nji «Olimp» toparlarynyň türgenleri şowly çykyş edip, degişlilikde öňdäki baýrakly orunlary eýelediler. Mary şäheriniň 2-nji sport mekdebiniň türgenleri üçünji orna mynasyp boldular.

Ýeňiji bolan toparlar iýun aýynda Mary welaýatynda geçirilmegi meýilleşdirilýän Türkmenistanyň birinjiligi ugrundaky şu ýaryşyň jemleýji tapgyryna gatnaşarlar.