Änew şäherindäki sport mekdebinde Türkmenistanyň Magtymguly adyndaky Ýaşlar guramasynyň Ak bugdaý etrap Geňeşiniň hem-de etrabyň sport we ýaşlar syýasaty bölüminiň bilelikde guramagynda, erkin göreş boýunça Ak bugdaý etrabynyň kubogyny almak ugrunda ýaryş geçirildi. geçen ýaryşa 2011—2013-nji ýyllarda doglan ýetginjekler gatnaşdy. Ýaryşyň guramaçylykly geçmegi ugrunda ähli şertler we mümkinçilikler üpjün edildi.

Ýaryşda ukyp-başarnygyny, erjelligini görkezmäge gelen ýetginjek ýaşlar 22, 24, 26, 28, 30, 32, 34, 36, 38, 40, 42, 44 kilogram agram derejelerinde güýç synanyşdylar. Çekeleşikli geçen tutluşyklar her agram derejesi boýunça güýçlüleri öňe saýlady. Şonuň bilen baglylykda, her agramda I, II, III orunlary eýelän türgenlere Ak bugdaý etrabynyň sport we ýaşlar syýasaty bölüminiň hormat hatlary hem-de Türkmenistanyň Magtymguly adyndaky Ýaşlar guramasynyň etrap Geňeşiniň ýadygärlik sowgatlary gowşuryldy.