Berkarar döwletiň täze eýýamynyň Galkynyşy döwründe ykdysady, syýasy, medeni we beýleki ugurlar bilen birlikde, ylym, bilim ulgamy hem uly ösüşlere beslenýär, jemgyýetimizi ösdürmekde aýratyn orny eýeleýär. Bu babatda döwletimizde häzirki döwürde ähli şertler döredildi. Bilim ulgamyna sanly serişdeleriň, öňdebaryjy kompýuter we multimediýa enjamlarynyň ornaşdyrylmagy nobatdaky möhüm we düýpli ädimleriň hatarynda durýar.

Ata Watanymyzyň ýagty geljegi ösüp gelýän ýaş nesliň bilimine, zehinine we höwesine köp derejede baglydyr. Şu nukdaýnazardan ýaşlaryň biliminiň hiliniň ýokarlandyrylmagyna, onuň halkara ölçeglerine laýyk getirilmegine uly üns berilýär, ýaş oglanlaryň we gyzlaryň häzirki zaman ylmynyň we täze tehnologiýalaryň gazananlaryny özleşdirip bilmekleri üçin ähli şertler döredilýär. Ýaş nesliň mynasyp derejede bilim almagyny üpjün etmek hem-de hünär başarnyklaryny artdyrmak, ýokary bilimli, beden taýdan sagdyn, watançylyk ruhundaky giň dünýägaraýyşly şahsyýetleri ýetişdirmek maksady bilen, bilim ulgamynyň maddy-enjamlaýyn we okuw-usulyýet binýady yzygiderli kämilleşdirilýär.

Bilim ulgamynyň döwrebap mazmuny adamzat ýaşaýşynyň aň-düşünjesini häzirki zamanyň ösen talaplaryna kybapdaş dowam etdirmekdir, onuň geçmiş mirasyny we häzirki gazananlaryny dolulygy bilen geljekki nesillere ýetirmekdir. Şoňa görä, kämil nesli kemala getirmek bilim ulgamynyň öňünde durýan döwlet derejesindäki baş aladalaryň biri hökmünde öňe çykýar.

Eziz Watanymyzyň ösüşli menzillerine özüniň mynasyp goşantlaryny goşjak ýokary bilimli hünärmen ýaşlary kemala getirmek maksady bilen ýaş nesle berilýän bilimiň hilini gowulandyrmak, olaryň ylym-bilim mümkinçiliklerini has-da artdyrmak, döwletimiziň ähli bilim edaralarynda sanly ulgamy ornaşdyrmak, ýaşlaryň giň dünýägaraýyşly, kämil nesiller bolup ýetişmegi ugrunda özüniň döredijilikli başlangyçlaryny öňe sürýän, ýaşlara okamaga, öwrenmäge giň mümkinçilikleri döredýän Gahryman Arkadagymyza we Arkadagly Serdarymyza köp sagbolsun aýdýarys.

Abdyrahmanberdi HUDAÝBERDIÝEW,

Döwletmämmet Azady adyndaky
Türkmen milli dünýä dilleri institutynyň
Ýakyn gündogar dilleri kafedrasynyň mugallymy.