"Çyzuwly geometriýa we inžener grafikasy" dersi boýunça sanly ulgam arkaly III Halkara olimpiadasy geçiriler

Türkmenistanyň Bilim ministrliginiň guramagynda “Çyzuwly geometriýa we inžener grafikasy” dersi boýunça sanly ulgam arkaly III Halkara internet-olimpiadasy 2025-nji ýylyň 10-njy maýynda geçiriler. Bu bäsleşik, matematika we tebigy ylymlar ugry boýunça zehinli talyplary ýüze çykarmak, olaryň özbaşdak çözgüt tapmak ukyplaryny ösdürmek, şeýle hem sanly maglumat-kommunikasiýa tehnologiýalaryny ornaşdyrmaga gönükdirilendir.

Olimpiada, Türkmenistanyň we daşary ýurtlaryň ýokary okuw mekdepleriniň talyplary üçin niýetlenip, türkmen, iňlis, rus dillerinde amala aşyrylar. Gatnaşyjylar ZOOM platformasynda online konferensiýa goşulyp, 10 sany çylşyrymly ýumuşy ýerine ýetirmeli bolarlar. Şahsy we toparlaýyn görnüşde geçirilýän olimpiada eminler topary tarapyndan bahalandyrylar we iň gowy netijeleri gazananlar diplomlar bilen sylaglanar.

Soňky ýyllarda Türkmenistanda geçirilýän şeýle intellektual bäsleşikler, ýaşlary ylma we döredijilige ruhlandyryp, ýurduň innowasion ykdysadyýetiniň ösmegine uly goşant goşýar.

Düzgünnamasy: Türkmenistanyň Bilim ministrligi
 

Nesip ATAMYRADOW
Türkmenistanyň Döwlet Energetika institutynyň talyby