Ahal welaýatynyň ýaş olimpiýaçylary taýýarlaýan sport mekdep-internatynda  Türkmen döwlet bedenterbiýe we sport institutynyň 5-nji ýyl talyby, Halkara agyr atletika federasiýasy tarapyndan 45 kilogram agramdaky türgenleriň arasynda dünýäniň çempiony diýlip ykrar edilen, milli ýygyndy toparymyzyň türgeni Ýulduz Jumabaýewa bilen duşuşyk geçirildi. Welaýat häkimligi, welaýatyň Sport we ýaşlar syýasaty Baş müdirligi, Türkmenistanyň Kärdeşler arkalaşyklarynyň Milli merkezi we Ahal welaýat birleşmesi tarapyndan guralan duşuşyga sport mekdep-internatynyň okuwçylary, ýaş türgenler hem-de jemgyýetçilik guramalarynyň wekilleri gatnaşdy.

      Ahal welaýatynyň Sport we ýaşlar syýasaty Baş müdirliginiň başlygynyň wezipesini ýerine ýetiriji Garryguly Garrygulyýew duşuşygy açmak bilen, onuň hormatly myhmany Ýulduz Jumabaýewa gazanan üstünligi bilen gutlady hem-de milli Liderimiziň türkmen türgenleriniň halkara derejesindäki ýaryşlara gatnaşmagy we üstünlikli çykyş etmegi ugrundaky edýän taýsyz tagallalary, döredýän giň şertlerdir mümkinçilik barada durup geçdi.

       Soňra türgen Ýulduz Jumabaýewa çykyş edip, sporta berýän ünsi, ýaşlaryň sport bilen meşgullanmagy, bu ugurda taplanmagy we uly belentliklere ýetmegi ugrundaky aladalary üçin Gahryman Arkadagymyzyň adyna alkyş sözlerini aýtdy. 

     — Agyr atletika boýunça dünýä çempionatynda 45 kilogram agramda çykyş edip, 1-nji orna we altyn medala mynasyp bolandygymy göz öňünde tutup, Gahryman Arkadagymyz meni Türkmenistanyň «Watana bolan söýgüsi üçin» medaly bilen sylaglady, şeýle-de maňa “Lexus LX570 Sport Plus”  kysymly ýeňil awtoulag serişdesini sowgat berdi. Bu sowgatlary hormatly Prezidentimiziň dabaraly ýagdaýda maňa gowşurmagy durmuşymdaky iň tolgundyryjy, şatlykly pursatlar boldy hem-de meni has uly üstünliklere ruhlandyrdy — diýip, çempion türgen Ýulduz Jumabaýewa şatlygyny paýlaşdy.

      Duşuşygyň dowamynda  türgen Ýulduz Jumabaýewa ajaýyp üstünligi bilen gutlap çykyş edenler, oňa ýene-de ýaryşlarda üstünlikleri arzuw etdiler. Soňra türkmen sportunyň buýsanjy, agyr atletikaçy Ýulduz Jumabaýewa gymmat guramaçylar tarapyndan sowgatlar gowşuryldy.