Garaşsyz Diýarymyzyň körpe nesliniň milli terbiýeli we döwrebap sowatly ýetişdirilmegi ugrundaky okuw-terbiýeçilik işleri mekdebe çenli çagalar edaralarynda sazlaşykly we toplumlaýyn esasda alnyp barylýar.

Bagtyýar nesilleriň watançylyk ruhly, ynsanperwer garaýyşly asylly sypatlarda kemala getirilmeginde ata-babalarymyzyň milli terbiýe ulgamyndan ugur alynýar. Çagalar bakja-baglarynda körpe nesilleriň päk ruhly, sagdyn garaýyşly kemala getirilmegi babatda terbiýeçilik işleriniň köpdürlüligi, ylmy esaslarda işlenip düzülen aýratynlyklary sözüň doly manysynda olaryň hakyky şahsyýet hökmünde ýetişdirilmegine gönükdirilendir. Şu nukdaýnazardan terbiýeçiler, mugallymlar çagalarda milli däplerimize görä ene dilimize söýgi döretmäge, zähmet gatnaşyklaryny öwrenmäge, ynsanperwerligi, adamkärçiligi we dost-doganlygy ündemäge çalyşýarlar. Şunda Magtymguly Pyragynyň eserlerinden, halk hazynasyndan, halk döredijiliginden, milli oýunlardan we halk pedagogikasyndan ugur alynýar. Çagalaryň milli terbiýeçilik ruhunda kemala getirilýändigi mekdebe çenli çagalar edaralarynda guralýan baýramçylyk säherlerinde, olaryň döredijilikli çykyşlarynda, göwnaçma we gyzyklanma çärelerinde we bäsleşiklerde has aýdyň duýulýar.

Elbetde, halkymyzyň dowamaty bolan bagtyýar nesillerimiziň milli terbiýesiniň, döwrebap sowatlylygy ugrundaky okuw işleri hem usuly taýdan kämilleşdirilýär. Şunda mekdebe çenli bilim maksatnamalaryndan ugur alnyp, sapaklar hil we guramaçylyk, mazmun we netijelilik taýdan tapawutlanýar. Sapaklaryň innowasion, işjeň we integrirlenen görnüşlerinde guralyp, olarda temalaryň maksadalaýyk özleşdirilmegi körpe nesilleriň mekdebe taýýarlygyny üpjün edýär.

Sapaklarda öwrenilenleriň dürli ugurlar boýunça gurnaklarda özleşdirilmegi, çagalaryň döwlet standartynyň ölçeglerine we görkezijilerine laýyklykda aýratyn işler arkaly kämilleşdirilmegi hem başarnyklary baýlaşdyrmakda, aýratyn zehinleri ýüze çykarmakda guralýan okuw-terbiýeçilik işlerini has-da mazmunlaşdyrýar. Şeýlelikde, beýleki usuly guramaçylyk çäreleriniň, gün tertibiniň beýleki pursatlarynyň üsti bilen döwletli döwrümiziň altyn nesilleri milli terbiýeli we döwrebap bilimli çagalar bolup ýetişýärler.

Şeýle ajaýyp zamanada çagalaryň irki ösüşi we mekdebe taýýarlygy ugrunda ähli mümkinçilikleri we şertleri döredip berýän, bilim işgärleriniň hünär babatda kämilleşip tejribelerini artdyrmaga aýratyn ähmiýet berýän, iň asylly işlerde belent görelde görkezýän Alym Arkadagymyza hem-de hormatly Prezidentimiz Arkadagly Gahryman Serdarymyza egsilmez alkyşlar aýdýarys!

Ogulboldy GÖKJÄÝEWA,
Daşoguz şäheriniň 12-nji çagalar bakja-bagynyň terbiýeçisi.