Eziz diýarymyzda Halkara derejesinde geçirilýän bäsleşikleriňdir olimpiadalaryň gerimi yzygiderli giňeýär. Munuň özi daşary ýurtlaryň abraýly ýokary okuw mekdepleridir iri ylym-bilim merkezleri bilen hyzmatdaşlygyň barha pugtalanýandygyna aýdyň şaýatlyk edýär. Ýaşlaryň dünýä ülňülerine laýyk ylym-bilim almagy üçin Gahryman Arkadagymyzyň, Arkadagly Gahryman Serdarymyzyň saýasynda durmuşa geçirilýän taýsyz tagallalar bimöçberdir. Maý aýynyň 22-25-i aralygynda Türkmenistanyň Daşary işler ministrliginiň Halkara gatnaşyklary institutynda Türkmenistanyň Bilim ministrliginiň hem-deTürkmenistanyň Daşary işler ministrliginiň Halkara gatnaşyklary institutynyň bilelikde guramagynda geçirilen «Halkara gatnaşyklary: parahatçylyk dialogynyň medeniýeti» atly halkara bäsleşik Merkezi Aziýa we Hazarýaka döwletleriniň, Türkiýe Respublikasynyň, Hytaý Halk Respublikasynyň, şeýle-de, Türkmenistanyň ýokary okuw mekdeplerinden jemi 250-den talyplarydyr magistrantlary bilim meýdanyna güýç synanyşdyrmak hem-de bilim gorlaryny baýlaşdyrmak üçin bir ýere jemledi. 

Bu halkara bäsleşigi özara intellektual ýaryş esasynda talyplaryň halkara gatnaşyklary boýunça zehin başarnyklaryny ýüze çykarmagy, degişli sebitleriň talyp ýaşlarynyň arasynda dostlukly gatnaşyklary berkitmegi, okuw-bilim tejribeligini alyşmaga ýardam bermegi, häzirki zamanda ýüze çykýan ylmy we amaly meseleleri çözmäge taýýar bolan ýaş hünärmenleri ýetişdirmegi, ýurdumyzyň we daşary ýurtlaryň ýokary okuw mekdepleriniň arasynda özara bähbitli gatnaşyklary ýola goýmagy we pugtalandyrmagy, Bitarap Türkmenistanyň medeni we bilim diplomatiýasyny wagyz etmek ýaly maksatlary göz öňüne tutýar. 

Selbi HOJALYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň 2-nji ýyl talyby.