Syýasy jemgyýetimiziň möhüm çäresi bolan Türkmenistanyň Milli Geňeşiniň Halk Maslahatynyň saýlawlary uly üstünliklere beslenip geçip, häzirki döwürde özüniň oňyn netijelerini berýär. Ýurdymyzyň ähli künjeklerinde Türkmenistanyň Milli Geňeşiniň iki palatasynyň maslahaty dogrusynda geçirilýän wagyz-nesihat çäreleri giň gerime eýe bolýar. Bu bolsa elbetde bagtyýar raýatlarymyzyň syýasy düşünjeleriniň kämilleşmegine, jemgyýetçilik düşünjeleriniň has-da artmagyna özüniň uly täsirini ýetirýär. Ynha şeýle asylly başlangyçlardan ugur alyp 12.05.2021-nji ýyl güni Ak bugdaý etrabynyň Gämi oba medeniýet  öýünde Türkmenistanyň Milli Geňeşi bilen Ak bugdaý etrap häkimligi we jemgyýetçilik guramalary bilen bilelikde Mukaddes Garaşsyzlygymyzyň 30 ýyllygy, paýtagt şäherimiz Aşgabadyň  esaslandyrylmagynyň 140 ýyllygynyň baýram edilýän ýylynda geçirilen Türkmenistanyň Milli Geňeşiniň iki palatasynyň birinji bilelikdäki maslahatynda Hormatly Prezidentimiziň eden taryhy çykyşyndan gelip çykýän wezipelerini halk köpçüligine ýetirmek maksady bilen wagyz-nesihat çäresi geçirildi. Bu geçirilen taryhy maslahata Türkmenistanyň Milli Geňeşiniň Halk Maslahatynyň agzalary, Mejlisiň deputatlary, durmuş-ykdysady pudaklaryň dürli ulgamlarynda zähmet çekýän bagtyýar raýatlarymyz gatnaşdylar. Maslahatda çykyş edenler Türkmenistanyň Milli Geňeşiniň Halk Maslahatynyň taryhy ähmiýeti dogrusynda giňişleýin çykyş etdiler. Maslahatyň ahyrynda Ak bugdaý etrabynyň Medeniýet we sungat ussatlary çykyş edip, maslahata gatnaşyjylara ruhy-lezzet paýlady.