Golaýda TDP-niň Babadaýhan etrap komitetiniň etrap häkimligi bilen bilelikde guramagynda Medeniýet merkezinde «Ýurdumyz berkarar — zenanlar bagtyýar» atly dabaraly maslahat geçirildi. Maslahata etrap häkimliginiň, Türkmenistanyň Zenanlar birleşiginiň etrap bölüminiň we beýleki jemgyýetçilik guramalarynyň wekilleri, etrapda ýerleşýän edara-kärhanalarda, bilim, saglygy goraýyş ulgamlarynda zähmet çekýän, şeýle hem işewür zenanlar, mährem eneler gatnaşdy.

Maslahatyň dowamynda Berkarar döwletiň täze eýýamynyň Galkynyşy döwründe gelin-gyzlaryň halal zähmet çekmegiň ajaýyp nusgasyny görkezýändikleri, olaryň dokaýan halylarynyň, çekýän keşdeleriniň, gaýaýan gaýmalarynyň, dürli nagyşlarynyň dünýä ýüzünde uly islege eýedigi hakynda buýsançly gürrüňler edildi.

Maslahata gatnaşanlar zenanlarymyza belent hormat goýýan Arkadagly Serdarymyzyň hem-de Gahryman Arkadagymyzyň janlarynyň sag, ömürleriniň uzak bolmagyny, halk bähbitli, ýurt ähmiýetli tutumly işleriniň rowaçlyklara beslenmegini arzuw etdiler.