Türkmenistanyň Bitaraplygynyň 29 ýyllygy mynasybetli Aşgabat şäherinde “Diplomatiýanyň altyn oky” atly ýaýdan ok atmak boýunça bäsleşik geçirildi. Bu ýaryş diplomatiýa ulgamynyň wekillerini bir ýere jemläp, sport we medeni gatnaşyklaryň dostlukly häsiýetini görkezdi.

Bäsleşige Türkmenistanda akkreditirlenen daşary ýurtlaryň we halkara guramalaryň diplomatik wekilhanalaryndan 40-a golaý wekili gatnaşdy. Ýaryşy Türkmenistanyň Milli ýaý atyjylyk federasiýasy hem-de Koreýa Respublikasynyň Aşgabatdaky ilçihanasy bilelikde gurady.

Dostlukly atmosferada geçirilen ýaryşda diplomatlar ýaýdan ok atmakdaky ussatlyklaryny görkezdiler. Erkekleriň arasynda Russiýanyň ilçihanasynyň ikinji sekretary Wadim Ýakowlew ýeňiji boldy. Ikinji orny ABŞ-nyň ilçihanasynyň wekili Patrik Rýanke eýelese, üçünji ýere BMG-niň Türkmenistandaky wekili Anton Gonçarok mynasyp boldy.

Zenanlaryň bäsleşiginde birinji orny ABŞ-nyň ilçihanasynyň wekili Katerina Ford gazandy. Koreýa Respublikasynyň ilçihanasynyň wekili Minkung Çaýe ikinji orny eýeledi, Ýaponiýanyň ilçihanasynyň wekili Mihaiko Sasaki bolsa üçünji ýerde tamamlandy.

“Diplomatiýanyň altyn oky” bäsleşigi, diňe bir sport ýaryşy bolmak bilen çäklenmän, diplomatik gatnaşyklary pugtalandyrýan dostlukly çäre hökmünde-de aýratyn ähmiýete eýe boldy. Ýaryşyň dowamynda gatnaşyjylar biri-biri bilen medeniýet we tejribe alyşdylar, bu bolsa ýurtlaryň arasyndaky gatnaşyklaryň has-da pugtalandyrylmagyna ýardam etdi.

Bu çäre Türkmenistanyň Bitaraplygynyň halkara derejesinde döredýän parahatçylyk we dostluk ýörelgelerini dabaralandyrýan we ýurtlaryň arasyndaky gatnaşyklary ösdürmäge ýardam edýän sport medeniýetiniň möhüm bir bölegine öwrüldi.

Jennet Döwletowa,
Beki Seýtäkow adyndaky mugallymçylyk
mekdebiniň 2-nji ýyl talyby.