2024-nji ýylyň 18-nji dekabrynda Türkmenistanyň Oguz han adyndaky Inžener-tehnologiýalar uniwersitetinde “Akylly” şäher: dolandyrmak, sanly, “akylly” we emeli aň tehnologiýalary, howpsuzlygy, ykdysadyýeti” atly halkara ylmy-amaly maslahat geçirilmegi meýilleşdirilýär. Çäräniň maksady, Arkadag şäheriniň innowasiýa we sanly tehnologiýalar boýunça gazanan üstünliklerini giňden wagyz etmek we halkara tejribeleri alyşmakdyr.

Ministrler Kabinetiniň Başlygynyň orunbasary B.Orazdurdyýewa bu çärä taýýarlyk işleri barada hasabat berdi. Arkadag şäheri şu ýylyň sentýabrynda Koreýanyň Seul şäherinde geçirilen “World Smart City Expo” halkara sergisinde birnäçe abraýly sylaglara mynasyp boldy. Şolaryň hatarynda “Iň tapawutlanan akylly şäher” we “Daşary ýurt akylly şäheri” ýaly atlar bar. Mundan başga-da, Arkadag şäheri sanly tehnologiýalaryň ornaşdyrylmagyna goşan ähmiýetli goşandy bilen hem halkara derejesinde tanalýar.

Arkadag şäheri Türkmenistanda ilkinji “akylly” şäher hökmünde durnukly ösüşiň we innowasion tehnologiýalaryň nusgasy bolup durýar. Şäheriň ähli infrastruktura ulgamlary sanly tehnologiýalar arkaly dolandyrylýar. Şeýle-de, daşky gurşawy goramak maksady bilen, şäherde ekologiýa taýdan arassa ulaglaryň – elektromobilleriň we elektrobuslaryň giňden ulanylmagy üpjün edilýär.

Bu halkara maslahat Türkmenistany sanly tehnologiýalar ulgamyndaky täze üstünliklere ýetirmekde möhüm ädim hökmünde kabul edilýär. Çäräniň dowamynda Arkadag şäheriniň milli tejribesi dünýä jemgyýetçiligine hödürlener, şeýle hem daşary ýurtly hünärmenler bilen tejribe alyşmak mümkinçilikleri giňeldiler. Bu çäre Arkadag şäheriniň innowasiýalarynyň halkara derejesinde has giňden tanadylmagyna ýardam eder.

Jahan Mirabowa,
Türkmen oba hojalyk institutyň
Agronomçylyk fakultetiniň
2-nji ýyl talyby