Gül ömrüñ, ykbalyñ, bagtyñ bossany,

Ak bagtym sen, paýtagtym sen Aşgabat.

Goýny toý-dabara, açyk asmany,

Howañ melhem şirin jana Aşgabat.

Gözellikler sende gelýär kemala,

Dünýä haýran bu gün ajap jemala,

Seniñ bilen ösýär tutuş zamana,

Sowulmaz baharym-ýazym Aşgabat.

Ýollaryñ ýüpekden, ýodañ aýnadan,

Joşly kalby galkyndyrýar gaýtadan,

Keşbi bilen dillerimizi saýradan,

Köñül bady, täsin jady Aşgabat.

Gözleriñ göwherden, ýakutdan gaşyñ,

Mydam dost-dogana gurşalan daşyñ,

Gadamyñ gaýratly, ileri işiñ,

Jana melhem, köñle ylham Aşgabat.

Aýnur HUDAÝBERGENOWA,

Türkmenistanyñ Daşary işler ministrliginiñ Halkara gatnaşyklary institutynyñ II ýyl talyby.