Ahal welaýatynyň maldarlary dowarlaryň ýaz gyrkymyna ykjam taýýarlykly gelip, guramaçylykly girişdiler. Ozalky ýyllarda toplanan baý tejribelere daýanmak arkaly bu jogapkärli çäräni degişli talaplara laýyklykda alyp barmakda çopan-çoluklardyr degişli hünärmenler mynasyp tagalla edýärler.

Ýaz gyrkymyny geçirmek üçin, Garagumuň ähli amatlyklary bolan giň ýaýlalary saýlanyp alyndy. Bu bolsa ýaz gyrkymynyň işjeň geçmegine oňaýly täsirini ýetirýär.

Bar bolan ene goýunlardan sagdyn owlak-guzynyň 53 müňden gowragyny alyp, bu babatdaky meýilnamany welaýatda ilkinjileriň hatarynda üstünlikli ýerine ýetirmek bilen, möwsümi üstünlikli jemlän Bäherden etrabynyň «Kirpili» maldarçylyk hojalygynyň dowardarlary ýaz gyrkymynda-da ugurdaş hojalyklara nusga bolýarlar.

Ýeri gelende belläp geçsek, welaýatyň Gökdepe, Ak bugdaý etraplarynyň maldarlarynyň arasynda hem bu iri hojalygyň göreldesine eýerýänler az däl.