2025-nji ýylda Horwatiýanyň paýtagty Zagrebde göreş boýunça dünýä çempionaty geçiriler. Bütindünýä göreş birleşigi (UWW) dünýä çempionatynyň geçiriljek ýerini we senesini resmi taýdan yglan etdi. 13-21-nji sentýabr aralygynda Horwatiýanyň paýtagty Zagrebde uly ýaşly türgenleriň arasynda dünýä çempionaty geçiriler.

Şeýle hem, 2025-nji ýylda geçiriljek beýleki möhüm halkara göreş ýaryşlarynyň hatarynda:

    •    17 ýaşly ýaşlaryň arasynda dünýä çempionaty: 8-nji iýul – 3-nji awgust aralygynda Gresiýanyň Afiny şäherinde 17 ýaşa çenli türgenleriň arasynda dünýä çempionaty geçiriler. Bu ýaryş ýaş türgenler üçin halkara arenasynda özlerini görkezmekde möhüm ädimdir.

    •    20 ýaşly ýaşlaryň arasynda dünýä çempionaty: Awgust aýynyň başyndan başlap, Bolgariýanyň paýtagty Sofiýada 20 ýaşa çenli türgenleriň arasynda dünýä çempionaty geçiriler. Bu ýaryş ýaş türgenleriň ulular kategoriýasyna geçmezinden ozal özlerini görkezýän ýaryşlaryň biri bolup durýar.

    •    Ýetginjekleriň dünýä çempionaty (U23): 20-26-njy oktýabr aralygynda Serbiýanyň Nowi Sad şäherinde 23 ýaşa çenli türgenleriň arasynda ýetginjekleriň dünýä çempionaty geçiriler. Bu ýaryş ulularyň arasynda çykyş etmäge taýýarlyk görýän ýaş zehinleriň gatnaşýan ýaryşy bolar.

Bu ýaryşlar ýaş göreşijileriň halkara tejribesini gazanmaklary üçin möhüm bolup, olar uly ýaşlylar çempionatyna, şol sanda Zagrebde geçiriljek uly ýaryşa taýýarlyk görýärler.

Serdar Garahanow,
Türkmen oba hojalyk institutynyň talyby.