"Belent binalar we şäher gurşawy geňeşi" (CTBUH) halkara guramasynyň garaşsyz bilermenler topary 2024-nji ýylyň iň gowy belent binasy baýragynyň eýesini yglan etdi. Bu baýragyň eýesi Singapurdaky Pan Pacific Orchard myhmanhanasy boldy. Myhmanhananyň beýikligi 150 metre ýetip, 23 gatdan ybaratdyr. Ol Singapuryň iň esasy söwda etraby bolan Orçard-roud köçesinde ýerleşýär. Bu bina Aziýanyň myhmansöýerligi bilen tebigaty özünde jemleýän nusgawy binagärlik keşbi bilen aýratynlyk görkezýär.

Pan Pacific Orchard myhmanhanasy şäheriň ýaşyl oazisi hökmünde tapawutlanyp, onuň esasy bölegini tebigata açylan görnüşli baglar, howuzlar we amatly dynç alyş ýerleri bolan açyk terrasalar emele getirýär. Şeýle-de, myhmanhanada 350 otag bolup, myhmanlara şäher durmuşyny we tebigaty sazlaşykly hödürleýän amatlyklar bilen üpjün edilýär. Bu desganyň innowasion binagärlik çözgütleri onuň dünýäniň iň gowy belent binalarynyň hatarynda durmagyna sebäp boldy.

Ogulsapar Öwezowa,
Türkmen oba hojalyk institutynyň
3-nji ýyl talyby.