Ýedilikler ummany paýhasly ata-babalarymyzyň köp asyrlyk durmuş tejribelerinden alnan gymmatly pähimlerini sünnäläp, ýaş nesillere miras galan ruhy hazynalarymyzyň biridir. Olarda durmuşyň, ynsan häsiýetleriniň dürli taraplary barada manyly pikirler öňe sürülýär. 

Ynsanyň mukaddes ýedi borjy: 

- Perwerdigäriň öňündäki borjy.
- Geçmişiň öňündäki borjy.
- Geljegiň öňündäki borjy.
- Watanyň öňündäki borjy.
- Maşgalanyň öňündäki borjy.
- Halkyň öňündäki borjy.
- Öz öňündäki borjy. 

Türkmen zenanyna mahsus bolan ýedi häsiýet: 

- Utanç-haýalylyk.
- Päkizelik.
- Sypaýyçylyk.
- Agraslyk.
- Eli çeperlik.
- Düşbülik.
- Süýjisözlülik. 

Şu ýedi işi eden sogap gazanar: 

- Pederlerimiziň ynam-ygtykatyny, dinini saklan.
- Ýol, köpri guran.
- Guýy, käriz gazan.
- Oglan okadan.
- Tersleşeni ýaraşdyran.
- Häkim bolup, halk üçin gije-gündiz alada eden.
- Hassanyň halyny soran.  

Şu ýedi zat şulardan doýmazmyş: 

- Adam —ylymdan doýmaz.
- Nebis — zatdan.
- Göz — bakmakdan.
- Gulak — eşitmekden.
- Aşyk — magşukdan.
- Zemin — ýagmyrdan.
- Derýa — suwdan. 

Şu ýedi häsiýeti özünde jemläne mert kişi diýse bolar: 

- Özüniň kimdigini tanaýan.
- Goýberen hatasyny boýnuna alan.
- Gaharyny ýuwudyp bilen.
- Il-gününiň agyrysyny süňňi bilen syzan.
- Il-gününe azaryny ýetirmedik.
- Özgäniň bagtyna guwanyp bilen.
- Il bähbidini özüniňki eden. 

Toplan: Kakajan HOJAÝEW,

Türkmen oba hojalyk institutynyň talyby.