2025-nji ýylyň 16-njy oktýabrynda Daşkentde ýerleşýän Mirzo Ulugbek adyndaky Özbegistanyň Milli uniwersitetinde Magtymguly Pyragynyň “Aşyk bolmuşam” atly goşgular kitabynyň tanyşdyrylyş dabarasy geçirildi. Bu çäre “Magtymguly – dünýäniň akyldary we onuň pelsepesiniň häzirki döwürdäki ähmiýeti” atly halkara maslahat bilen utgaşyklykda, 2025-nji ýylyň “Halkara Parahatçylyk we ynanyşmak ýyly” diýlip yglan edilmeginiň çäklerinde guraldy.

Maslahata we dabaralara Türkmenistanyň Özbegistandaky Ilçihanasy, Özbegistanyň dürli döwlet guramalarynyň wekilleri, Magtymgulyşynas alymlar, medeniýet işgärleri, ýokary okuw mekdepleriniň professor-mugallymlary we talyplar gatnaşdylar.

Türkmenistanyň Ilçisi Şadurdy Meredow çykyşynda Magtymguly Pyragynyň parahatçylyk, dostluk we ynsanperwerlik baradaky pikirleriniň häzirki zaman türkmen syýasatynyň esasy ýörelgelerine laýyk gelýändigini belledi. Şeýle hem, Prezident Serdar Berdimuhamedowyň “Magtymguly – dünýäniň akyldary” atly kitabynda bu pikirleriň giňden beýan edilýändigini nygtady.

Çykyş edenler Magtymgulynyň döredijiliginiň dünýä edebiýatynyň aýrylmaz bölegi bolup durýandygyny, onuň “Aşyk bolmuşam” ýaly şygyrlarynyň bolsa ruhy täsir we pelsepe taýdan ähmiýetiniň örän beýikdigini bellediler. Şeýle-de bu edebi mirasyň türkmen-özbek arasyndaky dostluk gatnaşyklaryny berkitmäge hyzmat edýändigi aýratyn nygtaldy.

Kerimmyrat DAŇATAROW,

Türkmenistanyň Döwlet energetika
institutynyň mugallymy.