Berkarar döwletimiziň bagtyýarlyk döwründe hormatly Prezidentimiziň il-ýurt bähbitli işlerinden, ýurdumyzyň gülläp ösmegi baradaky taýsyz tagallalaryndan egsilmez ylham we güýç alýan halkymyz ykdysadyýetiň ähli pudaklarynda uly-uly sepgitlere ýetýär. Mähriban Arkadagymyzyň kiçi we orta telekeçiligi goldamak we ösdürmek bilen bagly kabul edýän Kararlary netijesinde ýurdumyzyň çar künjünde gurlup ulanmaga berilýän hususy önümçilik kärhanalary döwletimiziň ykdysady kuwwatyny pugtalandyrmaga, halkymyzyň durmuş hal-ýagdaýynyň has-da ýokarlandyrylmagyna uly ýardam edýär.

       Bu gün içerki bazarlar we eksport üçin ekologiýa taýdan arassa, ýokary hilli önümleri öndürmek bilen, meşhurlygy barha artýan şeýle kärhanalaryň biride Ahal welaýatynyň Ak bugdaý etrabynyň Gämi geňeşliginde ýerleşýän Türkmenistanyň Senagatçylar we telekeçiler birleşmesiniň agzasy «Täç hil» hususy kärhanasy polietilen torbalary, çygly süpürgiçleri we beýleki hojalyk serişdelerini öndürýän kärhanasydyr. Türkmenistanyň Senagatçylar we telekeçiler birleşmesiniň agzasy bolan bu hususy kärhananyň Ak bugdaý etrabynyň senagat zolagynyň çäginde ýerleşýän önümçilik kärhanasy häzirki wagtda netijeli işleri alyp barýar. Halkymyzy çygly süpürgiç önümçiligi we polietilen torbalar, ýuwujy seişdeler bilen üpjün edýän bu kärhana 2015-nji ýylda ulanyşa girizildi. Kärhananyň 1 aýyň dowamyndaky önümçilik kuwwaty polietilen torbalaryň 120 tonnasyny, çygly süpürgiçleriň 700 müňden gowuragyny, ýuwujy serişdeleriň 500-550 müň sanysyny, suwuk sabynlaryň 600 müň sanysyny,  antibakteriýal serişdeleriň 2.5-3 millýon sanysyny öndürmeklige niýetlenendir.

      Dünýäniň ösen ýurtlarynyň kämil we doly awtomatlaşdyrylan tehnologiýalary bilen enjamlaşdyrylan kärhanada öz işine ussat işçi hünärmenleriň ençemesi zähmet çekýär. Olaryň agzybirlikli zähmeti bilen, kärhananyň önümçilik bölümlerinde alnyp barylýan işleriň depgini barha ýokarlanyp, halkymyz tarapyndan uly isleg bildirilýän we daşary bazarda bäsdeşlik etmäge ukyply önümler öndürilýär. Bu ýerde ýerli çig maly ulanmak arkaly öndürilýän önümleriň görnüşlerini artdyrmak maksady bilen, täzeçil çemeleşmelere aýratyn ähmiýet berilýär. Munuň özi bolsa, önümleriň täze-täze görnüşleriniň önümçiliginiň ýola goýulmagyna ýardam edýär. “Türkmenistan — Bitaraplygyň mekany” ýylynyň özünde hem kärhanada birnäçe täze görnüşli önümleriň çykarylyp başlanmagy şeýle diýmäge esas berýär.

      Bu hususy kärhanasynda ilkibaşda polietilen paketleri, çygly süpürgijiň ençeme görnüşleri öndürilen bolsa, bu gün ýuwujy serişdeleriň, suwuk sabynlaryň we antibakteriýal serişdeleriň birnäçe görnüşi bilen olaryň üsti ýetirildi. Häzirki wagtda kärhanada polietilen torbalarynyň, çygly süpürgiçleriň, gap-gaç ýuwujy serişdeleriň, suwuk sabynlaryň, şeýle hem el üçin antibakteriýal gigiýeniki serişdeleriň önümçiligi giň gerim alýar. Kärhanada ýokary hilli polietilen torbalary müşderileriň buýurmalary esasynda, islendik galyňlykda, reňkde we ölçeglerde öndürilýär. Polietilen torbalary öndürmek üçin Türkiýe we Germaniýa döwletleriniň iň kämil enjamlary ulanylýar. Häzirki wagtda kärhanada “Täç hil” haryt nyşanly çygly süpürgiçleriň 27-den gowrak görnüşi öndürilýär. Ýokary hilliligi bilen tapawutlanýan bu çygly süpürgiçler ýurdumyzyň çäginde ýokary islegden peýdalanýar. Olar biri-birinden gapdaky mukdary, ulanylýan maksatlary, daşky gabynyň bezegi we düzüm aýratynlygy bilen tapawutlanýar.

      Kärhanada häzirki wagtda ýokary hilli gap-gaç ýuwujy serişdeleriň dürli görnüşleriniň önümçiligi amala aşyrylýar. Bu serişdeleriň gap-gaçlardan ýaglary aýyrmak, şeýlede bakteriýalara garşy ähmiýeti uludyr. Alyjylaryň talabyny we ösen islegini kanagatlandyrmak maksady bilen, kärhanada ýakynda ýörite bezegli gaplarda 1 kilogram ölçegde gap-gaç ýuwujy serişdeleriň 3 görnüşiniň (alma, limon, pyrtykal) önümçiliginiň ýola goýlandygyny bellemelidiris.

      Kärhanada öndürilýän suwuk sabynlar hem ekologiki taýdan arassa düzümi bilen ilat arasynda uly meşhurlyga eýedir. Bu sabynlar elleri ýumşadyjy häsiýeti, hoşboý ysy bilen ünsi çekýär. Bakteriýalary doly derejede aýyrmaga ukyply bolan bu ýokary hilli sabynlar ýörite enjamlar arkaly owadan we oňaýly gaplara gaplanyp, söwda nokatlarynyň üsti bilen ilata ýetirilýär.

Kärhanada önümçiligi täzelikde ýola goýlan antibakteriýal serişdeleriň täze görnüşi hem ol ýerde zähmet çekýän hünärmenleriň netijeli gözlegleriniň miwesi bolup durýar. Bakteriýalary ýok etmekde hem-de elleriň derisini ýumşadyp, witaminler bilen üpjün etmekde ýokary häsiýete eýe bolan bu serişdeleriň her bir görnüşiniň özboluşly täsir edijiligi bar. El üçin gigiýeniki tämizleýji odekolonlar hem-de gel görnüşli gigiýeniki goraýjy serişdeleriň önümçiligi aýratyn bellenilmäge mynasypdyr. 50 ml, 200 ml we 250 ml ölçeglerdäki gaplara gaplanan, limon, orhideýa, lawanda ýaly önümleriň hoşboý ysy garylan bu antibakteriýal serişdeleriň hil derejesi hil barlaghanalaryndan üstünlikli geçdi. “Täç hil” hususy kärhanasynyň gel görnüşli antibakterial serişdesiniň önümçiligi Merkezi Aziýa döwletleriniň arasynda ilkinji bolup, ýola goýlandygyny bellemek has-da ýakymlydyr.

Şu günler kärhanada düzüminde üzärlik dänejikleri bolan gel görnüşli antibakteriýal serişdeleriniň önümçiligi alnyp barylýar. Üzärlik, Hormatly Prezidentimiziň “Türkmenistanyň Dermanlyk ösümlikleri” atly ensiklopediki eserlerinde hem belleýşi ýaly bakteriýalary ýok etmekde gadymdan bäri ulanyp gelinýän ösümlik görnüşidir. Bu ösümlik özüniň düzümindäki alkaloid himiýasy esasynda bakteriýalary düýpli ýok etmäge ukyplydyr. Bu günki gün düzüminde üzärlik dänejikleri bolan hemde 60 göterime barabar bolan milli etil spirtimizi ulanyp, halkymyza hödürlenýän bu önüm, özüniň ýokary hilli düzümini, hoşboý ysyny, tebigy reňkini we ýokumyny üzärlikden alýar hem-de ellerimizdäki bakteriýalary doly ýok etmäge we uzak wagtyň dowamynda ellerimizi zyýanly bakteriýalardan goramaga ukyplydyr. Antibakteriýal serişdeler söwda nokatlarynyň şeýle-hem onlaýn söwda web sahypalarynyň üsti bilen, ildeşlerimize elýeterli bahadan ýetirilýär.

Hormatly Prezidentimiziň ýurdumyzyň ähli edara-kärhanalarynda alnyp barylýan işleri sanly ulgamyň mümkinçiliklerinde ýerine ýetirmek maksady bilen, kärhananyň hünärmenleri kärhananyň web sahypasynda halkyň islegini düýpli öwrenmek maksady bilen dürli onlaýn sowalnamalary alyp barýarlar. Bu sowalnamalaryň netijelerinde alnan maglumatlara esaslanyp, hünärmenler diňe gözlegde bolup, innowasion tehnologiýalarda işläp, önümleriň täzeden-täze görnüşlerini öndürmäge synanyşýarlar. Şu maksat bilen arassaçylyk, tämizlik üçin öndürýän ýokary hilli, ekologiýa taýdan arassa önümlerini halkymyzyň saglygyna gönükdirýärler. “Täç hil” hususy kärhanasy gelejekde halkyň islegine görä ýokary hilli alkogolsyz antibakteriýal çygly süpürgiçleriň önümçiligini, egin-eşik ýumşadyjylary, suwuklandyrylan egin-eşik ýuwujy serişdeleri, şeýle hem başgada öý hojalyk serişdeleriniň birnäçe görnüşleriniň önümçiligini ýola goýmagy meýilleşdiriýär.

Ösüş-özgermelere beslenen täze taryhy döwrümizde milli ykdysadyýetimiziň hususy ulgamynyň täze belentliklere çykmagyna saldamly goşant goşmagy we özüniň ýokary hilli önümleri bilen içerki we daşarky bazarda uly meşhurlyga eýe bolmagy maksat edinýän “Täç hil” hususy kärhanasynyň işçi hünärmenleri Hormatly Prezidentimize köp sag bolsun aýdýarlar.