Häzirki zaman dünýäsi ylmy-tehniki ösüşiň ýokary depginler bilen ilerlemegi bilen häsiýetlendirilýär. Bu ösüşiň merkezinde iňlis dili durýar, sebäbi häzirki wagtda ylmy makalalaryň, tehniki resminamalaryň, halkara standartlaryň we innowasion taslamalaryň aglaba bölegi hut iňlis dilinde taýýarlanylýar. Şonuň üçin hem tehniki ugurly hünärmenleriň we talyplaryň iňlis dilindäki tehniki adalgalary doly we dogry derejede özleşdirmegi zerur şert bolup durýar.

Tehniki adalgalar ýörite hünär dili bolup, olar umumy leksikadan düýpli tapawutlanýar. Köp halatlarda bir söz diňe bir tehniki ugurda anyk we çäkli many berýär. Şeýle adalgalary dogry düşünmek we ýerlikli ulanmak hünärmeniň hünär derejesine göni täsir edýär. Şu sebäpli hem elektron görnüşdäki tehniki sözlükleriň döredilmegi we olaryň okuw prosesinde giňden peýdalanylmagy aýratyn ähmiýete eýedir.

Elektron sözlükleriň esasy artykmaçlygy olaryň çalt elýeterliligidir. Internet ýa-da mobil goşundy arkaly talyp islendik wagtda zerur adalgany tapyp, onuň many­syny, ulanylyş aýratynlygyny we terjimesini öwrenip bilýär. Şeýle sözlükler diňe bir terjime bilen çäklenmän, adalganyň düşündirişini, mysal sözlemlerini, grafiki şekillerini we sesli okalyşyny hem hödürleýär. Bu bolsa tehniki maglumatlaryň has çuňňur özleşdirilmegine ýardam berýär.

Mundan başga-da, elektron sözlükler yzygiderli täzelenýän çeşme bolup durýar. Tehnologiýanyň ösmegi bilen täze adalgalar döreýär we olaryň çap görnüşindäki sözlüklere girizilmegi belli wagt talap edýär. Elektron sözlüklerde bolsa täze terminleriň çalt goşulmagy mümkin bolup, bu hünärmenleriň häzirki zaman talaplaryna laýyk bilim almagyna mümkinçilik döredýär.

Netijede, iňlis dilindäki tehniki adalgalaryň elektron sözlügini peýdalanmak talyplaryň hünär taýýarlygyny ýokarlandyrýar, olaryň özbaşdak bilim almagyny ösdürýär we halkara ylmy-tehniki hyzmatdaşlykda üstünlikli gatnaşmagyna berk binýat döredýär.

Ogulmaral BOPBYÝEWA,

Türkmenistanyň Döwlet energetika
institutynyň mugallymy.