Dil halkyň ruhy baýlygynyň we medeni mirasynyň aýrylmaz bölegidir. Hytaý dili hem müňýyllyklaryň dowamynda kemala gelen, çuňňur manyly, simwoliki we milli aýratynlyklara baý dildir. Şonuň üçin hytaý dilini öwrenmek diňe bir söz baýlygyny we grammatiki gurluşy özleşdirmek bilen çäklenmän, onuň milli usulyýetini hem çuňňur öwrenmegi talap edýär.

Hytaý diliniň milli usulyýeti halkyň pikirleniş ýörelgesini, däp-dessurlaryny, aragatnaşyk medeniýetini we jemgyýetçilik gatnaşyklaryndaky etiketi öz içine alýar. Mysal üçin, hytaý jemgyýetinde hormat goýmak, ululara we ýolbaşçylara aýratyn sypaýçylyk bilen ýüzlenmek möhüm hasaplanýar. Bu aýratynlyklar dilde-de aýdyň ýüze çykýar we olary bilmeseň, sözleriň dogry manyda kabul edilmezligi mümkin.

Milli usulyýeti kämilleşdirmek daşary ýurtly talyplaryň hytaý dilini diňe bir formal taýdan däl-de, hakyky durmuşda netijeli ulanyp bilmegine ýardam edýär. Diliň kontekstual manylaryny, simwoliki aňlatmalaryny we durnukly söz düzümlerini öwrenmek aragatnaşygy has täsirli edýär. Bu bolsa işewürlik, diplomatiýa we ylmy hyzmatdaşlykda aýratyn ähmiýete eýedir.

Mundan başga-da, milli usulyýetiň öwredilmegi medeniýetara aragatnaşyk ukybynyň ösmegine ýardam berýär. Talyplar hytaý halkynyň dünýä garaýşyna, däp-dessurlaryna hormat goýmagy öwrenýärler, bu bolsa özara düşünişmegiň berkemegine getirýär. Şeýle çemeleşme häzirki zaman halkara gatnaşyklarynda möhüm orun eýeleýär.

Netijede, hytaý diliniň milli usulyýetini kämilleşdirmek dili öwretmegiň netijeliligini ýokarlandyrýar, talyplaryň dünýä dillerine we medeniýetlerine giň garaýyş bilen çemeleşmegine mümkinçilik döredýär hem-de halkara hyzmatdaşlygyň üstünlikli ösmegine hyzmat edýär.

Aýna NURMYRADOWA,

Türkmenistanyň Döwlet energetika
institutynyň mugallymy.