Azal — ýer sürmek üçin ulanylýan gadymy gural. Agaç ussalary bu guraly ýogyn agaçdan taraşlap ýasaýar. Onuň ok, künde ýaly uly bölekleri bolýar. Azalyň ýerdemrini demirçi ussalar çoýundan ýa-da demirden bejeripdirler. Ýer sürlende azal, esasan, bir jübüt mala ýa-da düýä, öküze tirkelipdir.

Aňňal ― maňňal, esasan, bugdaý, arpa ýaly galla ekinlerini ormak, kähalatlarda ýandak, ot ýatyrmak üçin ulanylýan uly orak, oňa aňňal orak hem diýilýär. Onuň ýüzi dişelmeýär, çalnyp ýiteldilýär. Onuň ýarym aý görnüşli aýlawy beýleki ot oraklaryna garanda has uly bolýar.

Buljura — guýynyň agzynyň zaýalanmazlygy ýa-da suw dökülip palçyk bolup durmazlygy üçin ýörite goýulýan tagta.

Galtak — iki sapyndan tutulyp, öňe tarap itip ýöredilýän bir tigirli gol arabajygy. Galtak bilen hojalykda ders, çäge ýaly zatlar daşalýar.

Gaňrak — gergenek. Owlak-guzy tutmak üçin gaňyrçakly taýak ýa-da ujy toýnuk görnüşli edilip ýasalan enjam.

Gilmala — dilmala, malaçow — jaýyň diwarynyň ýüzüne laýdan suwag çekmek üçin ulanylýan ýasy demir enjam. Boýy 25, ini 8 — 10 santimetr, galyňlygy 1 millimetr çemesindäki ýasy demriň ortasyna, kähalatda bir gyrasyna agaç ýa-da demir tutawaç oturtmak arkaly ýasalýar. Gilmala agaçdan hem ýasalýar.

Dewil — juwazyň sokusynyň ýag ýygnanan ýeri, düýbi.

Desgaw — oturan ýeriňde ekin otamak üçin gysga saply kepje, pilçe.

Selim TÖRÄÝEW,
Türkmen oba hojalyk institutynyň
Agronomçylyk fakultetiniň agronomçylyk hünäriniň 1-nji ýyl talyby.