Her ýyla mynasyp at berilmegi ýurdumyzda indi asylly däbe öwrüldi. Bu ýagdaý döwletimizi ösdürmegiň möhüm ugurlaryna ünsi çekmäge, il-ýurt bähbitli beýik işlere, özgertmelere giň ýol açýar. Ýagşy niýetler, uly arzuw-umytlar bilen garşylan täze, 2023-nji ýylymyzyň «Arkadag Serdarly bagtyýar ýaşlar ýyly» diýlip atlandyrylmagy bolsa biz — ýaş nesilleriň ata Watanymyza bolan söýgimizi we döredijilikli zähmet çekmäge yhlas-höwesimizi has-da artdyrdy.

«Ýaşlar biziň geljegimizdir» diýen aýtgy ýaş nesiller babatdaky gürrüňlerde gaýta-gaýta nygtalýar. Aňymyza ornan bu jümle gönüden-göni döwlet syýasatynda ýurduň geljegi baradaky aladanyň beýanydyr. Diýmek, ýaşlarda ýurduň geljegi görülýär. Diýmek, 2023-nji ýylyň «Arkadag Serdarly bagtyýar ýaşlar ýyly» diýlip atlandyrylmagynyň düýp özeninde ertirki günümiz hakyndaky, geljek babatdaky alada ýatandyr.

Golaýda, Türkmenistanyň Döwlet medeniýet merkeziniň Mukamlar köşgünde 2023-nji ýylyň «Arkadag Serdarly bagtyýar ýaşlar ýyly» diýlip atlandyrylmagy mynasybetli dabaraly maslahat geçirildi. Oňa ýurdumyzyň medeniýet ulgamynyň ýolbaşçy düzümi we köp sanly işgärleri, sungat ussatlary, şeýle-de ugurdaş bilim ojaklarynyň mugallymlarydyr talyplary gatnaşdylar.

Çykyşlara giň orun berlen, aýdym-sazlara beslenen maslahat Arkadag Serdarly bagtyýar ýaşlar ýylynyň dabaraly medeni çärelerine özboluşly badalga boldy. Onuň ahyrynda hormatly Prezidentimiziň adyna Ýüzlenme kabul edildi. 

Täzegül SAPAROWA, 

Türkmen döwlet binagärlik-gurluşyk 
institutynyň uly mugallymy.