Paýtagtymyzda ýerleşýän Halkara ahalteke atçylyk toplumynyň açyk manežinde «Ýylyň iň owadan ahalteke bedewi» atly halkara gözellik bäsleşiginiň ikinji tapgyry geçirildi. Bu bäsleşik Türkmen bedewiniň milli baýramyna bagyşlanan dabaralaryň başlangyjy hökmünde ýokary derejede geçirildi. Oňa ýurdumyzyň welaýatlaryndan we paýtagtyndaky atçylyk merkezlerinden, şeýle-de hususy atşynaslardan​ saýlanyp alnan 20 sany iň owadan bedew gatnaşdy.

Her ýyl geçirilýän bu halkara gözellik bäsleşigi türkmen atşynaslygynyň ösdürilmegine we milli medeni mirasymyz bolan ahalteke bedewleriniň dünýä ýüzündäki abraýynyň artdyrylmagyna gönükdirilendir.

Bäsleşikde bedewler ilkinji nobatda tebigy görnüşde, hiç hili bezegsiz sahna çykarylyp, olaryň reňki, bedew gurluşy, gylyklary we ýöreýşi boýunça eminler tarapyndan bahalandyryldy. Soňra bolsa, milli däplere laýyklykda bezelen görnüşde meýdança çykyp, täsirli çykyş etdiler. Şeýle hem atlaryň nesil ugurlary we gelip çykyşlary barada giňişleýin maglumat berildi.

Bäsleşigiň bu tapgyrynda bedewleriň owadanlygy aýratyn tapawutlandy. Dabara atşynaslar, eminler, myhmanlar we hormatly ýaşulular gatnaşyp, bedewleriň gözelligine şaýat boldular.

Netijede, eminleriň çözgüdi boýunça, bäsleşigiň döwlet derejesindäki jemleýji tapgyryna gatnaşmak üçin 10 bedew saýlanyp alyndy.