Meşhur habarlaşma programmasy “WhatsApp” edara-kärhanalar üçin täze aýratynlygyň üstünde işleýär. “WhatsApp” - işewürlik profilini ýokarlandyrmak şeýle-de iş hasaplaryna goşmaça aýratynlyklar hödürlemek üçin täze tölegli agza bolmak meýilnamasynyň üstünde işleýär.

“WhatsApp” -daky iş hasaplary üçin “Birikdirilen enjamlar” bölümi täzeden işlenilýär we bu bölüme tölegli agza bolmak aýratynlygy goşular. Täze aýratynlygyň kömegi bilen 4 dürli enjamda şol bir “WhatsApp Business” hasaby açyp bolar. Şeýlelik bilen, bir kärde zähmet çekýän dört adam şol bir hasap bilen aragatnaşyk gurup biler.

Adaty şertlerde 4-e çenli enjamy goldajak täze aýratynlyk, tölegli abunalyk bilen 10-a çenli enjamy goldap biler. “WhatsApp” -yň tölegli agza bolmak üçin dürli aýratynlyklary hem getirjekdigi mälim edildi, ýöne häzirlikçe bu aýratynlyklar doly tanyşdyrylmady.

Ýatladyp geçsek, “WhatsApp Messenger” 2009-njy ýylda smartfonlar üçin işlenip düzülen gyssagly habarlaşma we jaň şeýle-de aragatnaşyk programmasydyr. Wagtyň geçmegi bilen platforma dünýäniň ähli ýerinde uly meşhurlyk gazanyp, iň gowy aragatnaşyk platformasyna öwrüldi.

Enejan URAÝEWA,

Döwletmämmet Azady adyndaky
Türkmen milli dünýä dilleri
institutynyň talyby.