Düýn Türkiýäniň Stambul şäherinde Türkmenistanyň eksport harytlarynyň giň gerimli sergisi açyldy. Bu sergi Stambul Sergi Merkezinde geçirilip, Türkmenistanyň daşary ykdysady syýasatynyň möhüm ugurlarynyň biri hökmünde, türkmen-türk söwda-ykdysady gatnaşyklarynyň hem-de işewür hyzmatdaşlygynyň mundan beýläk-de ösdürilmegine gönükdirilendir. Bu barada Türkmenistanyň resmi metbugaty habar berdi.

Serginiň açylyş dabarasynda Türkmenistanyň hem-de Türkiýäniň döwlet senalary ýaňlandy. Soňra geçirilen çykyşlarda iki ýurduň resmi wekilleri bu çäre bilen gutlap, onuň ýurtlaryň arasyndaky dostlukly gatnaşyklary has-da berkitjekdigine ynam bildirdiler.

Çykyş edenler Türkmenistanyň we Türkiýäniň dürli ykdysady ugurlarda hyzmatdaşlyga uly üns berýändiklerini nygtadylar. Şeýle hem sergä ýurdumyzyň döwlet we hususy sektoryndan wekilleriň gatnaşmagynyň bu gatnaşyklaryň ýokary derejesiniň aýdyň subutnamasydygy bellenildi.

Dabara gatnaşyjylar sergi bilen tanyşdylar. Onda Türkmenistanyň önüm öndürijileri tarapyndan eksport edilýän dürli görnüşli ýokary hilli harytlar – senagat we oba hojalyk enjamlary, ätiýaçlyk şaýlary, gurluşyk serişdeleri, öý we elektronika enjamlary, hojalyk harytlary, dokma önümleri hem-de hyzmatlar görkezilýär.

Bu sergi hyzmatdaşlygy giňeltmek, täze ugurlary ýüze çykarmak, tejribe alyşmak we işewür gatnaşyklary ösdürmek üçin netijeli meýdança hökmünde hyzmat edýär. Şeýle-de ol türkmen-türk hyzmatdaşlygynyň uzakmöhletleýin we durnukly häsiýete eýedigini görkezýär.

2–5-nji iýul aralygynda geçirilen bu sergä Türkmenistanda öndürilýän harytlaryň giň toplumy hödürlenip, milli ykdysadyýetiň dürli pudaklarynda alnyp barylýan döwrebaplaşdyrmak we diwersifikasiýa işleri, döwlet maksatnamalary we innowasion taslamalar pudaklaýyn diwarlyklar arkaly giňişleýin görkezildi.

Oguljan KURBANOWA,

Türkmenistanyň Daşary işler ministrliginiň
Halkara gatnaşyklary institutynyň talyby.