16-njy ýanwarda, Türkmenistanda Saýlawlary we sala salşyklary geçirmek boýunça merkezi toparyň nobatdaky mejlisi geçirildi. Ol Mejlisiň ýedinji çagyrylyşynyň deputatlarynyň, welaýat, etrap we şäher halk maslahatlarynyň bäşinji çagyrylyşynyň agzalarynyň, Geňeşleriň dokuzynjy çagyrylyşynyň agzalarynyň saýlawlaryna taýýarlyk görmek baradaky meselelere bagyşlandy. Mejlise merkezi saýlaw toparlarynyň agzalary, merkezi saýlaw toparynyň ýanynda döredilen iş toparlarynyň wekilleri, ýurdumyzyň syýasy partiýalarynyň we jemgyýetçilik guramalarynyň jogapkär işgärleri, köpçülikleýin habar beriş serişdeleriniň wekilleri gatnaşdylar.

Mejlisiň gün tertibine öňde boljak saýlawlary geçirmek bilen baglanyşykly birnäçe meseleler girizildi. Hususan-da, Türkmenistanyň Milli Geňeşiniň Mejlisiniň kararyna laýyklykda, bu möhüm jemgyýetçilik-syýasy çäräni 2023-nji ýylyň 26-njy martynda geçirmek bellenildi. Merkezi saýlaw topary saýlawlara taýýarlyk görmek we olary geçirmek boýunça çäreleriň gündelik meýilnamasyny tassyklady. Türkmenistanyň Saýlaw kodeksine, Türkmenistanda Saýlawlary we sala salşyklary geçirmek boýunça merkezi toparyň kararyna laýyklykda, 2023-nji ýylyň 16-njy ýanwaryndan başlap saýlaw möwsümine badalga berilýändigi yglan edildi. Saýlawlaryň başlanmagyna 60 gün galanda dalaşgärleri teklip etmek başlanýar.

Merkezi saýlaw toparynyň karary bilen, Türkmenistanyň Mejlisiniň deputatlarynyň saýlawlary boýunça saýlaw okruglarynyň 125-si, hususan-da, Aşgabat şäherinde 17-si, Ahal welaýatynda 16-sy, Balkan welaýatynda 10-sy, Daşoguz welaýatynda 27-si, Lebap welaýatynda 26-sy, Mary welaýatynda 29-sy döredildi. Bu okruglaryň san belgileri, atlary, merkezleri we araçäkleri baradaky maglumatlar merkezi we ýerli metbugatda çap ediler. Okruglaryň we Geňeşlikleriň bäş ýyllyk ygtyýarlyk möhletiniň tamamlanmagy bilen baglylykda, Türkmenistanyň Saýlaw kodeksine laýyklykda, Mejlisiň deputatlarynyň saýlawlary boýunça okrug saýlaw toparlary, şeýle hem Geňeşleriň agzalarynyň saýlawlary boýunça etraplardaky şäherleriň, şäherçeleriň we geňeşlikleriň saýlaw toparlary döredildi.

Saýlaw toparynyň düzümine syýasy partiýalar, jemgyýetçilik guramalary we raýatlaryň toparlary tarapyndan wekiller öňe sürüldi. Şeýlelikde, 125 okrugdan ybarat saýlaw topary hem-de etraplardaky şäherleriň, şäherçeleriň we geňeşlikleriň 572 sany saýlaw topary döredildi. Welaýat halk maslahatlarynyň agzalarynyň saýlawlary boýunça saýlaw okruglarynyň 240-sy welaýatlaryň her birinde, Aşgabat şäherinde bolsa 40-sy döredildi. Etrap, şäher halk maslahatlarynyň agzalarynyň saýlawlary boýunça etraplaryň we şäherleriň hersinde degişli saýlaw okruglarynyň 20-si — jemi 980-si: Ahal welaýatynda 160, Balkan welaýatynda 180, Daşoguz welaýatynda 160, Lebap welaýatynda 180, Mary welaýatynda 220, Aşgabat şäherinde 80 okrug döredildi.

Şu mejlisiň çäklerinde oňa gatnaşyjylar öňde boljak möwsümiň birnäçe guramaçylyk meselelerini ara alyp maslahatlaşdylar. Saýlaw işleriniň geçirilişine diňe bir syýasy partiýalar we jemgyýetçilik guramalary tarapyndan milli synçylar däl, eýsem, halkara bilermenlerdir synçylar hem gözegçilik ederler. Hususan-da, zerur resminamalar, şol sanda gollanmalar, gözükdirijiler, synçylar hem-de ýurdumyzyň raýatlary üçin dürli maglumatlar tassyklandy, birnäçe saýlaw toparlarynyň agzalary üçin okuw sapaklaryny geçmek meýilleşdirildi.

Mejlise gatnaşyjylar saýlawlaryň aýdyňlygyny we giň bäsdeşligini üpjün etmek boýunça möhüm wezipeleri kesgitlediler. Şunuň bilen baglylykda, hormatly Prezidentimiz Serdar Berdimuhamedowyň döredijilikli içeri we daşary syýasatynyň, amala aşyrylýan giň möçberli döwlet maksatnamalarynyň, syýasy-demokratik özgertmeleriň mazmunyny ilat arasynda giňden wagyz etmäge gönükdirilen çäreleri işjeňleşdirmegiň wajypdygy bellenildi. Şeýle hem welaýatlaryň we Aşgabat şäher saýlaw toparlarynyň ýolbaşçylarynyň öňde boljak saýlawlara taýýarlyk boýunça alyp barýan işleri, dürli derejedäki çäreleri guramagyň meseleleri baradaky maglumatlary diňlenildi. Onda ilat arasynda geçirilýän wagyz-nesihat işlerine möhüm ornuň degişlidigi aýdyldy. Bellenilişi ýaly, saýlaw toparlaryna aýratyn jogapkärçilik degişlidir. Olaryň anyk we sazlaşykly işi wajyp jemgyýetçilik-syýasy çäräniň üstünliginiň möhüm şertini emele getirýär.

Mejlisiň deputatlarynyň, halk maslahatlarynyň we Geňeşleriň agzalarynyň saýlawlarynyň demokratik ýörelgeleri çuňlaşdyrmagyň ýolundaky möhüm ädimdigini we oňyn özgertmeleri üstünlikli durmuşa geçirmekde ygtybarly binýat bolup durýandygyny nygtap, merkezi saýlaw toparynyň agzalary saýlaw möwsüminiň ýokary derejede geçirilmegi ugrunda ähli zerur tagallalaryny gaýgyrmajakdyklaryna ynandyrdylar.

Türkmenistanda Saýlawlary we sala salşyklary geçirmek boýunça merkezi toparyň mejlisiniň dowamynda başga-da birnäçe guramaçylyk meselelerine garaldy we olar boýunça degişli çözgütler kabul edildi.