2026-njy ýylyň 4-nji fewralynda Bişkek şäherinde geçirilen B5+1 formatyndaky iki günlük işewürlik forumyna Türkmenistan hem gatnaşýar. Forum Merkezi Aziýanyň bäş döwleti bilen Amerikanyň Birleşen Ştatlarynyň arasynda ykdysady hyzmatdaşlygy pugtalandyrmak maksady bilen guraldy. 

Çärä gatnaşýanlaryň hatarynda döwlet edaralarynyň ýokary derejeli wekilleri, işewürlik assosiasiýalarynyň ýolbaşçylary, halkara kompaniýalaryň, maliýe institutlarynyň hem-de bilermenler jemgyýetiniň wekilleri bar.

Forum Halkara Hususy Telekeçilik Merkezi tarapyndan Gyrgyzystanyň Ministrler Kabineti bilen hyzmatdaşlykda guralyp, döwlet we hususy pudaklaryň arasynda yzygiderli dialogy ösdürmäge gönükdirilen uzak möhletleýin hyzmatdaşlyk meýdançasy hökmünde çykyş edýär.

Duşuşygyň dowamynda maýa goýum we işewürlik gurşawyny kämilleşdirmek, oba hojalygy, syýahatçylyk, ulag-logistika, maliýe-bank ulgamy, elektron söwda, IT pudagy hem-de möhüm mineral serişdeler boýunça hyzmatdaşlygy ösdürmek meseleleri giňden ara alnyp maslahatlaşylýar. Şeýle-de forumyň çäklerinde panel çekişmeleri geçirilip, B5+1 iş toparlary tarapyndan täze sebitleýin işewürlik gün tertibi hödürlenýär.

Şeýle hem bu barada Biznes Türkmenistan web-saýtynda okap bilersiňiz.

Ogulsona GURBANOWA,

S.A.Nyýazow adyndaky Türkmen oba hojalyk
uniwersitetiniň mugallymy.