Seýitnazar Seýdi adyndaky Türkmen döwlet mugallymçylyk institutynyň guramagynda ýurdumyzyň orta mekdepleriniň 11-nji synp okuwçylarynyň arasynda matematika, fizika, himiýa, biologiýa dersleri boýunça 2-nji açyk internet olimpiadasy geçirildi.

Olimpiadada ýurdumyzyň orta mekdepleriniň zehinli okuwçylary saýlap alan ugurlary boýunça berlen wagtyň dowamynda ýumuşlary ýerine ýetirdiler. Şonuň netijesinde oňa gatnaşan okuwçylaryň 50-si baýrakly orunlara mynasyp boldy. Ýurdumyzyň welaýatlarynyň we paýtagtymyz Aşgabat şäheriniň zehinli okuwçylarynyň gatnaşmaklarynda geçirilen olimpiadanyň ýeňijileriniň arasynda lebaply okuwçylaryň 7-siniň bardygy bellärliklidir. Türkmenabat şäherindäki ýöriteleşdirilen 39-njy orta mekdebiň okuwçysy Jennet Joraýewa iň utuk gazanyp, matematika dersi boýunça 1-nji orna mynasyp boldy.