Türkmenistanyň Halkara Maýa Goýum Forumy (TIF 2025) we onuň çäklerindäki sergi 2025-nji ýylyň 18–19-njy sentýabrynda Aşgabatda, Söwda-senagat edarasynyň binasynda geçiriler. Bu forum daşary ýurtly maýadarlary, halkara maliýe guramalaryny we türkmen bazarynda iş alyp barmaga gyzyklanma bildirýän kompaniýalary bir ýere jemleýär. Bu barada Söwda-senagat edarasy habar berýär.

Forumyň maksady – Türkmenistanyň maýa goýum mümkinçiliklerini giňden beýan etmek we daşary ýurt maýasyny çekmegiň netijeli ýollaryny ara alyp maslahatlaşmakdyr. Çäräniň dowamynda gatnaşyjylar bilelikdäki we sebitleýin taslamalary amala aşyrmak, şeýle hem eksport mümkinçiliklerini giňeltmek boýunça pikir alyşarlar. Mundan başga-da, sanly ykdysadyýete geçmek we bu ugurdaky sanly çözgütleriň ösdürilmegi aýratyn üns merkezinde bolar.

TIF 2025 sergisi bolsa senagat, oba hojalygy, energetika, gurluşyk, ulag we aragatnaşyk ýaly esasy ykdysady ugurlarda gazanylan üstünlikleri görkezýän interaktiw giňişlik hökmünde çykyş eder. Myhmanlar türkmen kompaniýalarynyň önümleri we dürli pudaklarda ulanylýan öňdebaryjy tehnologiýalar, innowasiýalar bilen tanyşmaga mümkinçilik alarlar.

Şeýle forumlaryň öňkisi 2024-nji ýylyň sentýabr aýynda guralypdy.

Aýlar BATYROWA,

Türkmenistanyň Daşary işler ministrliginiň
Halkara gatnaşyklary institutynyň talyby.