Garaşsyzlyk - her bir halkyň durmuşynda iň beýik we iň gymmatly gymmatlyklarynyň biridir. Ol halkyň öz ykbalyny öz eli bilen kesgitlemegine, öz ýoluny saýlamagyna, milli däp-dessurlaryny, dilini, medeniýetini we ruhy mirasyny erkin ösdürmegine giň mümkinçilik berýär. Garaşsyz döwlet bolmak - diňe bir belli bir çäkde ýaşamak däl-de, eýsem, özbaşdak pikirlenmek, öz geljegiňi özüň gurmak we dünýäde öz mynasyp ornuňy eýelemek diýmekdir.

Türkmen halkynyň taryhyna ser salanymyzda, azatlyk we garaşsyzlyk düşünjeleriniň halkymyzyň kalbynda hemişe aýratyn orun eýeländigini görmek bolýar. Türkmen halky gadymy döwürlerden bäri öz topragyna, diline, milli däp-dessurlaryna we erkinligine uly sarpa goýup gelipdir. Halkymyzyň baý taryhy, medeni mirasy, edebiýaty we sungaty onuň özbaşdak ruhy dünýäsiniň bardygynyň aýdyň subutnamasydyr.

Garaşsyzlyk halk üçin täze mümkinçilikleriň gapysyny açýar. Döwlet özbaşdaklygyny gazanan halk öz ykdysadyýetini, bilim ulgamyny, medeniýetini, ylmyny we beýleki ugurlaryny öz islegine görä ösdürmäge mümkinçilik alýar. Şeýle döwürde her bir raýat öz ýurdunyň ösüşine goşant goşmak üçin has uly jogapkärçilik duýýar. Sebäbi ýurduň geljegi her bir raýatyň zähmetine, bilimlerine, başarnygyna we watansöýüjiligine baglydyr.

Garaşsyzlygyň iň uly gymmatlyklarynyň biri hem milli özboluşlylygy gorap saklamakdyr. Her bir halkyň öz dili, taryhy, medeniýeti, sungaty, edebiýaty we däp-dessurlary bolýar. Garaşsyz döwlet öz milli gymmatlyklaryny ösdürmäge we geljek nesillere ýetirmäge giň mümkinçilik döredýär. Türkmen diliniň, milli medeniýetimiziň, halk döredijiligimiziň, milli senetlerimiziň we däp-dessurlarymyzyň ýaş nesle öwredilmegi hem garaşsyzlygyň beren gymmatly mümkinçilikleriniň biridir.

Atajan ORAZLYÝEW,

Türkmenistanyň Daşary işler ministrliginiň

Halkara gatnaşyklary institutynyň talyby.