Tejen etrap Tehniki hyzmat ediş kärhanasynyň işgärleri şu ýyl gowaça ekiljek ýerlerde, ekiş döwründe ulanyljak oba hojalyk tehnikalaryny möwsüme taýýarlamak işleri güýçli depginde alnyp barylýar. Bu ugurda möhüm agrotehniki çäreleri öz wagtynda, ýokary derejede geçirmek üçin häzirki wagtda kärhanada ekiş tehnikasyny, gurallaryny abatlamak, taýýarlyk hataryna çykarmak ugurynda uly işler geçirilýär.

       Etrabyň tehniki hyzmat ediş kärhanasyna we daýhan birleşiklerine degişli bolan dürli görnüşdäki gurallar şu günler ýene-de bir gezek täzeden gözden geçirilýär. Bu kärhananyň işgärleriniň çekýän tutanýerli zähmeti netijesinde möwsümde işlediljek gowaça ekişi hem-de gowaçalaryň hatar aralaryny bejermekde ulanylýan gurallar, ýerleri ýumşatmakda ulanylýan baranalar düýpli abatlanyp, olaryň taýýarlyk hataryna çykarylýar. Munuň özi bolsa etrabyň çäginde oba hojalyk gurallaryny möwsüme birkemsiz taýýarlamaga şert döredýär. Kärhananyň işgärleri ekiş tehnikasynyň möwsüme taýýarlygyny hemişe üns merkezinde saklaýarlar.

     Şonuň ýaly-da, bu ugurda dünýäniň ösen döwletlerinden satyn alynýan, ýokary öndürijilikli kämil tehnikalarynyň, gowaça ekiji, bejergi hem-de beýleki guralarynyň tapgyrlaýyn gelip gowuşmagy, Tejenli daýhanlaryň oba hojalyk önümlerini öndürmekdäki işleriniň barha ilerlemegine ýardam berýär. Muňa bolsa etrabynyň pagtaçy kärendeçileri diýseň oňat düşünýärler. Daýhanyň arka daýanjyna öwürilen tehnikalara eýeçilik gözleri bilen seretýärler.