Ýurdumyzda köpçülikleýin bedenterbiýäni ösdürmäge, sagdyn durmuş ýörelgelerini rowaçlandyrmaga türkmen ýaşlary işjeňlik we uly ruhubelentlik bilen gatnaşýarlar. Sport, bedenterbiýe çäreleriniñ köpçülikleýin häsiýetde geçirilmegi we dabaralanmagy, olarda ýaş nesilleriň üstünlikli çykyş etmegi buýsanç bilen bellärliklidir. Şunuň bilen baglylykda, biziň sport mekdebimizde ussat türgenleriň täze nesli kemala gelip, olar halkara ýaryşlarda ýurdumyzyň, döwlet derejesindäki ýaryşlarda bolsa sport mekdebimiziň abraýyny ynamly goraýarlar.

Gahryman Arkadagymyzyň hem-de hormatly Prezidentimiziň taýsyz tagallalary bilen ýurdumyzyň ähli künjeginde, şol sanda biziň sport mekdebimizde hem bedenterbiýe we sport bilen yzygiderli meşgullanmak üçin ähli şertler döredildi. Giň mümkinçiliklerden peýdalanyp, ýaş nesillerimiziň sporty gündelik durmuşynyň aýrylmaz bir bölegine öwürmegi aýratyn buýsandyryjy ýagdaýdyr.

Ýeri gelende bellesek, şu ýylyň 7 ― 10-njy noýabry aralygynda sportuň kik-boks görnüşi boýunça Türkmenistanyň kubogy geçirilip, onda ussat tälimçi Alekseý Halaturyň türgenleri üstünlikli çykyş etdiler. Olar 1 sany altyn, 1 sany kümüş, 1 sany bürünç medal gazandylar hem-de halkara görnüşinde altyn medala mynasyp boldular. Şeýle hem 19 ― 23-nji noýabr aralygynda geçirilen karate-do boýunça Türkmenistanyň kubogynda ezber tälimçi Maksat Atdaýewiň türgenleri çykyş edip, 3 sany altyn, 5 sany kümüş, 4 sany bürünç medal gazandylar.

Halkara derejesinde gazanylan üstünlikler bolsa sport ussatlaryny täze ýeňişlere ruhlandyrýar. Maglumat hökmünde belläp geçsek, 2024-nji ýylyň 11-nji noýabrynda Gazagystan Respublikasynda geçirilen Dünýä çempionatynda tälimçimiz Zarina Abdyrahmanowa bürünç medal eýeledi. Şeýle hem 8 ― 17-nji noýabr aralygynda Russiýa Federasiýasynyň Tatarystan Respublikasynyň Kazan şäherinde geçirilen ulularyň we ýaşlaryň arasynda sportuň guşakly göreş boýunça Dünýä çempionatynda Pälwan Gulgeldiýew ulularyň erkin usulynda altyn medala mynasyp boldy.

Bu görkezijiler häzirki wagtda sporty ösdürmek babatda edilýän bimöçber aladalaryň oňyn netijesidir, sportuň dürli görnüşleri boýunça kämilleşmek üçin zerur şertleriň döredilendigidir. Bu zatlaryň özen-örki bolsa, ýurdumyzyň geljegi bolan sagdyn bedenli, kämil düşünjeli watançy nesilleri kemala getirmekden ybaratdyr. Ýaş nesillere ähli mümkinçilikleri döredip berýän Gahryman Arkadagymyzyň hem-de hormatly Prezidentimiziň janlary sag, belent başlary aman bolsun!

Atajan HYDYROW,
Ak bugdaý etrabynyň sport mekdebiniň müdiri.