Hytaýyň prezidenti Si Szinpin penşenbe güni Peruda “Çankaý” megaportuny resmi taýdan açdy. Bu port Hytaýyň “Guşak we Ýol” başlangyjynyň möhüm bölegi bolup, Günorta Amerika bilen Aziýanyň arasyndaky söwda gatnaşyklaryny täze derejä çykarmagy maksat edinýär.

“Çankaý megaporty” Hytaýyň Günorta Amerikadaky ilkinji maliýeleşdirilen port taslamasy bolup, 1,3 milliard dollarlyk maýa goýum arkaly durmuşa geçirildi. Taslama Perunyň asuda balykçylyk şäherini halkara söwda merkezine öwürer we Latyn Amerikasyndaky Hytaýyň täsiriniň artýandygyny äşgär eder.

Portuň açylyş dabarasynda Si Szinpin Perunyň prezidenti Dina Boluarte bilen duşuşdy. Si, “Bu taslama Peruda uly girdeji we iş mümkinçilikleri getirjek möhüm başlangyçdyr,” diýip, açylyşda belledi.

“El Peruano” gazetinde çap edilen makalada Si Çankaý megaportunyň ýyllyk 4,5 milliard dollara çenli girdeji gazanjakdygyny we 8 000-den gowrak iş ýeriniň dörediljekdigini aýtdy. Şeýle hem, Peru bilen Hytaýyň arasyndaky logistika çykdajylarynyň 20 göterim azaljakdygyny nygtady.

Peru prezidenti Dina Boluarte bu taslamanyň ýurduň ykdysady ösüşine goşýan goşandyny aýratyn belledi we Hytaýyň halkara söwdadaky öňdebaryjy ornuny öwdü.

Portuň açylyşy Günorta Amerikanyň söwda infrastrukturasyna täze güýç berip, Aziýa bilen söwda gatnaşyklaryň hilini ýokarlandyrjak ädim hökmünde görülýär. Şeýle-de bolsa, bu taslama Waşingtonda käbir aladalaryň döremegine sebäp boldy.

Aýgözel Çaryýewa,
Türkmen oba hojalyk institutynyň
1-nji ýyl talyby.