Häzirki dünýä ykdysady şertlerinde ýurtlaryň durnukly ösüşi diňe içerki mümkinçiliklere däl, eýsem sebitara hyzmatdaşlygyň derejesine hem berk baglanyşyklydyr. Türkmenistan bu hakykaty öňden duýup, hormatly Arkadagymyzyň binýat goýan hem-de Arkadagly Gahryman Serdarymyzyň dowam etdirýän daşary syýasatynda sebitara hyzmatdaşlygy we ykdysady diplomatiýany döwlet ösüşiniň möhüm gurallarynyň biri hökmünde kesgitledi. Bu syýasat ýurduň ykdysady bähbitlerini goramak bilen bir hatarda, sebitde durnuklylygy we özara ynamy pugtalandyrmaga hyzmat edýär.

Türkmenistanyň ykdysady diplomatiýasy ilkinji nobatda parahatçylyk, bitaraplyk we özara peýdaly hyzmatdaşlyk ýörelgelerine esaslanýar. Bitarap döwlet hökmünde Türkmenistan sebit ýurtlary bilen deňhukukly, açyk we uzak möhletleýin hyzmatdaşlygy ösdürýär. Ykdysady diplomatiýanyň çäginde energiýa, ulag-logistika, söwda we maýa goýum ugurlarynda alnyp barylýan gatnaşyklary giňeltmek milli ykdysadyýetiň ösüşine täze mümkinçilikler açýar.

Sebitleýin hyzmatdaşlygyň möhüm ugurlarynyň biri energetika pudagydyr. Türkmenistanyň baý energiýa serişdeleri sebit ýurtlary bilen hyzmatdaşlykda netijeli ulanylýar. Energiýa serişdeleriniň ygtybarly iberilmegi, täze geçelgeleriň döredilmegi we özara bähbitli taslamalaryň durmuşa geçirilmegi diňe bir ykdysady peýda getirmän, eýsem sebitde energetika howpsuzlygyny hem pugtalandyrýar. Bu ýagdaý Türkmenistanyň ykdysady diplomatiýasynyň strategik ähmiýetini aýdyň görkezýär.

Ulag-logistika ulgamynda alnyp barylýan hyzmatdaşlyk hem ykdysady diplomatiýanyň möhüm bölegidir. Sebitleýin ulag geçelgeleriniň ösdürilmegi, halkara ýol taslamalarynyň durmuşa geçirilmegi Türkmenistanyň geografik mümkinçiliklerinden doly peýdalanmaga şert döredýär. Bu ugurda daşary ýurtlar bilen alnyp barylýan hyzmatdaşlyk ýurduň ykdysady roluny güýçlendirýär we halkara söwdada mümkinçilikleri artdyrýar.

Sebitleýin hyzmatdaşlygyň başga bir möhüm tarapy söwda-ykdysady gatnaşyklarynyň giňeldilmegidir. Türkmenistanyň ykdysady diplomatiýasy sebit ýurtlary bilen söwda gatnaşyklaryny ösdürmäge, bilelikdäki kärhanalary döretmäge we täze bazarlara çykmaga gönükdirilendir. Bu ýagdaý milli önüm öndürijileriň mümkinçiliklerini giňeldýär, ykdysadyýetiň diwersifikasiýasyna we içerki bazaryň berkemegine ýardam berýär. Ykdysady diplomatiýanyň çäginde bilim, tehnologiýa we innowasiýa ugurlarynda hyzmatdaşlyk hem aýratyn ähmiýetlidir. Sebit ýurtlarynyň tejribelerini öwrenmek, täze tehnologiýalary ornaşdyrmak we işgär taýýarlygy ulgamynda hyzmatdaşlygy ösdürmek milli ykdysadyýetiň uzak möhletleýin ösüşine hyzmat edýär. Şeýle hyzmatdaşlyk Türkmenistanyň diňe häzirki däl, eýsem geljek ykdysady mümkinçiliklerini hem pugtalandyrýar.

Şeýlelikde, sebitara hyzmatdaşlyk we ykdysady diplomatiýa Türkmenistanyň ösüş strategiýasynyň aýrylmaz bölegidir. Hormatly Arkadagymyzyň we Arkadagly Gahryman Serdarymyzyň öňe sürýän parahatçylyk söýüji, açyk we hyzmatdaşlyga esaslanýan syýasaty Türkmenistanyň sebitde ygtybarly hyzmatdaş hökmünde tanalmagyny üpjün edýär. Hut şu ýol bilen Türkmenistan milli ykdysady bähbitlerini gorap, sebitde durnukly ösüşe we özara bähbitli hyzmatdaşlyga goşant goşýar.

Maýa ATAMYRADOWA,

Türkmenistanyň Döwlet energetika
institutynyň mugallymy.