Nar witaminlere, mineral maddalara we peýdaly mikroelementlere örän baýdyr. Ol güýçli antioksidant we sowuklama garşy häsiýetlere eýedir, şeýle hem, ol bogunlaryň ýagdaýyna oňyn täsir edýär we ýürek-damar keselleriniň ýüze çykmak howpuny peseldýär.

Nary we nar şerbetini kabul etmeklige garşy görkezmeler kän däl, emma şeýle-de bolsa, olar bar.

Nar şerbeti gan basyşyny peseltmäge ukyply, şonuň üçin gipotoniýada (gan basymynyň pes bolmagy), ony kabul etmekligi azaltmaly. Şeýle-de nar gany suwuklandyrmak ukybyna eýedir, şol sebäpli ony trombozlaryň öňüni almaklyk üçin ulanyp bolar. Emma, eger siz gany suwuklandyrmak üçin ýörite derman serişdelerini kabul edýän bolsaňyz, onda ony nar bilen bilelikde utgaşdyrmak bolmaýar. Şeýle edilende, ganyň lagtalanmagy bilen bagly meseleler ýüze çykyp biler.

Şeýle hem, nar aşgazan-içege ulgamynyň keselleriniň birnäçesi üçin gadagan edilen önümleriň sanawyna girýär. Sebäbi bu miwe aşgazanda duz turşusynyň işlenip çykarylyşyny ýokarlandyrýar, munuň netijesinde uzak wagtlap dowam edýän keselleriň ýitelmegine getirip bilýär.

Öz dişleriniň ýagdaýy barada alada edýän adamlar, iýmit sanawyndan naryň möçberini azaltmaly. Sebäbi, naryň şerbedi ýygy-ýygydan kabul edilende, onuň düzümine girýän maddalar diş gabygyny dargadyp we inçeldip biler.

Aýdylanlardan başga-da, nar şerbedini kiçi çagalara içirmek maslahat berilmeýär. Çaganyň iýmit sanawyna bu önümi iki ýaşdan öň girizmeli däl. 

Batyr NURYÝEW,

Türkmen oba hojalyk institutynyň mugallymy