Türkmen tebigatynyň täsinlikleri halkyň milli sungatynyň ösmegine, gaýratly, güýçli pälwanlaryň ýüze çykmagyna öz täsirini ýetiripdir. Taryhda ýurdumyzyň pälwanlarynyň käbiriniň göreşe girmezden ozal bökedaşy göterip, garşydaşyna näderejede güýçlüdigini görkezendigi ýa-da gatnawly ýollaryň üstünde ýeriň örküji ýaly bolup ýatan äpet daşlary bir tarapa süýşürendigi barada täsirli gürrüňler hem-de rowaýatlar bar. Şolaryň biri-de, Köýtendagyň Hojapil obasyna barýan ýoluň ugrundaky pälwandaşdyr. 

Agramy 584 kilograma deň bolan pälwandaş Köýtendag täsinlikleriniň biri hasaplanýar. Ony 1882 — 1917-nji ýyllarda Hojapil obasynda ýaşap geçen Ahmet hajy ogly Hudaýberdiniň — Mişan pälwanyň göterendigi barada aýdylýar.