Ýakynda türkmen diplomatiýasynyň milli mekdebi bolan Türkmenistanyň Daşary işler ministrliginiň Halkara gatnaşyklary institutynda «Merkezi Aziýa — Koreýa» formatyndaky birinji sammitiň ähmiýetini koreý halkynyň köpçülikleýin habar beriş serişdelerinde wagyz etmek hem-de türkmen-koreý gatnaşyklary barada ýörite maglumatlary taýýarlamak üçin Türkmenistana sapar bilen gelen Koreýa Respublikasynyň «Yonhap» habarlar agentliginiň habarçysy Song Doheniň ýolbaşçylygyndaky wekiliýet bilen tanyşlyk duşuşygy geçirildi.

Onuň dowamynda myhmanlar ýurdumyzyň bilim ulgamyna degişli edaralaryna, şeýle-de Türkmenistanyň Daşary işler ministrliginiň Halkara gatnaşyklary institutynyň türkmen diplomatiýasynyň taryhy muzeýine, «Parahatçylyk medeniýeti» atly ÝUNESKO klubuna baryp, ol ýerdäki eksponatlar bilen ýakyndan tanyşdylar we ýokary baha berdiler.

Şeýle-de tanyşlyk saparynyň dowamynda ikitaraplaýyn gatnaşyklaryň ösdürilmeginiň zerurdygy bellenildi. Hususan-da, ýaş hünärmenleriň tejribe alyşmagyny mundan beýläk-de ilerletmek, bilim babatyndaky gatnaşyklary ýokary derejä çykarmak geljegi uly bolan ugurlaryň hatarynda görkezildi.

Soňky ýyllarda Koreýa Respublikasy bilen Türkmenistan özara bähbitli hyzmatdaşlygy ösdürmäge ähmiýet berýär. Dürli ugurlary öz içine alýan hyzmatdaşlygyň hatarynda elektronika we kompýuter tehnologiýalary babatdaky işleri mysal getirmek bolar. Galyberse-de, türkmen talyplarynyň Koreýadaky abraýly ýokary okuw mekdeplerde bilim almaklary, akademiki alyşmalaryň işjeň häsiýetde bolmagyny şertlendirýär.